Nipi malunnaatilimmik pitsaanerusoq tulliani
- Koda Awards 2011-ip aallakaatinnerani nipip ajorneranut pissutaavoq atortut pisoqqat atorneqarmata aammalu KNR-mi sulisut piginnaasaasa naammannginnerat, KNR-imi aallakaatsitassiornermut pisortaq Jan Berg KNR.gl-imut taama oqarpoq.
Taamaammat aliikkussersuilluni aallakaatitsinissaq tulleq tassaasoq Katersuiniarneq 2011 novemberip tallimaat aallakaatinneqalerpat nipilerineq nipilerisartunut avataaneersunut suliakkiissutigineqarpoq.
- Nipilerinermik annertuumik suliassaqartillugu KNR piareersaataasumik ataatsimiisitsisarniarpoq, peqataasussat, nipimik suliaqartut, scene-mi aqutsisoq, qullerisoq tv-milu aallakaatitassiortut peqatigiillutik misissuataartassavaat nipilerinermut atortut, nipit aqqutissaat, scene-miinnermut pilersaarut takutitassat ilaalu ilanngullugit oqaluuserineqartassalluitk, Jan Berg ilisimatitsivoq.
Koda Awards-imik aallakaatitsineq ilaatigut isornartorsiorneqarpoq Inuit Nunaanni Nipilersortartut Kattuffiannit kiisalu Eqqumiitsuliornikukt Pinngorartitsisut Ingerlatsissullu peqatigiiffiannit.