Nipi ilisarnartoq soraarninngorpoq
Pineqartoq tassaavoq Lisa Nielsen KNR radiop nutaraanerata nalaani aamma erinarsullaqqissutut ilisimaneqartoq maanna soraarninngortoq.
Lisa Nielsen KNR-imut suliartoqqaarpoq apriilip aallaqqaataa 1958 ukiorpassuillu ingerlaneranni aalajaalluni suleqataasimalluni. KNR-mut atajuaannarsimavoq. Ukiut amerlanngitsut ilaqquttani ilagalugit Danmarkimi najugaqallatsiarsimavoq kingornali illoqarfimmut inunngorfimminut angerlarluni.
Aallakaatitassiarisarsimavai nipilersornermut tunngasut, meeqqanut tunngasut allarpassuillu kulturimut attuumassuteqartut.
Aamma radiop nutaajunerata nalaani "pingasulissat"-nik taaneqartartuni erinarsoqataasarpoq qatanngutini Gertrud aamma Pauline peqatigalugit erinarsuuterpaalussuit immiussimallugit.
Radiomi aallakaatitassiortutut 1958-miit 2012-mut sulisuuneq assigiinngitsorpassuarnik unammilligassaqarfiusimavoq. Båndimut immiussissutit oqimaatsut nagra-t ersullugit nassatarineqartarsimapput ukiunilu makkunani digitaliusumik suleriaatsimi aallakaatitassat qarasaasiap teriaa atorlugu aallakaatitassiortarluni mikrofonilu ullutsinni nutaaliaasuni "bånditut" atulersimalluni taskip anginngitsup iluaniisinnaalluni.
Lisa Nielsen, aasamut 70-nik ukioqalersussaq, ukiut ingerlaneranni aallakaatitassiarpassuarnik suliaqarsimavoq maanna KNR-ip toqqorsivianut inissinneqareersunik. Taamaammat ilimanarsinnaalluarpoq aallakaatitassiarisarsimasai siunissami aamma tusallattaasarumaarivut.
