NIISIP: Nuna tamakkerlugu akissarsiat qaffallik
Kommune Kujalliup isumaginnernermi siunnersortinut akissaatit pillugit isumaqatigiissutaasunik amerlanerusunik aningaasarsiaqartitsinissamik kissaateqarnera, isumaginninnermi siunersortit tupaallannanngitsumik nuannaarutigaat.
- Neriuppunga nuna tamakkerlugu assigiimmik pineqassasut. Suliassammi amerlaannanngillat aamma oqimaatsuupput. Akissaatitigut sulinnermilu atukkatigut ukiorpassuarni ilungersunartumik inissisimanikuupput, iIsumaginninermi siunersortit peqatigiiffiata NIISIP-ip siulittaasua, Sara Abelsen, Kommume Kujalliup aningaasaqarnermut naalakkersuisoqarfimmut pisortatigoortumik saaffiginnissuteqarnera oqaaaseqarfigalugu KNR-imut oqarpoq.
Aamma atuaruk Akissarsiat amerlanerusut Kommune Kujallermit piumasarineqartut
Kommunip naalakkersuisoqarfimmut kissatigaa, aningaasarsiat pillugit maanna isumaqatigiinniarnerni ilassuteqaqqullugu, kommuni piukkunnaatilinnik sulisussarsiornermini immikkut ajunngitsorsiassaliinissamut periarfissillugu.
Saaffiginnissut Kommuneqarfik Sermersuumit, aamma isumaginninermi siunnersortinik ilinniartitsisunillu amigaateqartumi, tapersersorneqarpoq. Assersuutigalugu Tasiilaq isumaginninnermi siunersortinik pingasunik amigaateqarfiuvoq.
Aamma atuaruk Aamma Sermersooq amerlanernik akissarsiaqartitserusuppoq
Aningaasarsiat qaffannissaasa saniatigut artorfimmut atatillugu inissat pilerinarnerusut kommunit neqeroorutigerusuppaat.
Inissat pitsaanerusut saniatigut aamma isumaginninnermi siunnersortit suliatik pillugit ikorfartoqatigiissinnaanissat pisariaqartoq, Sara Abelsen oqarpoq. Tassami siunnersortit suliatik pisariusut kisermaattariaqartarpaat.
- Ilinniarsimasunik allanik peqatissaqanngikkaanni kiserliornartarpoq, ilinniakkat aallaavigalugit suliat oqimaatsut oqallisigisinnaanissaat amigaataasarami, isumaginninermi siunersortit peqatigiiffiata siulittaasua, Sara Abelsen, oqarpoq.
