Nick Nielsenip tunuartitaanini paasisinnaanngilaa
Maannakkulli Nick Nielsenip nassuiatigaa, tunuartitaanerminut tunngaviusoq paasisinnaanagu aamma oqaaserinikuunngisaminut naqqiissummik suliaqaqqusaanini tupigusuutigalugu:
- Oqaaseqarpallaarsinnaanngilanga tusaatissatulli tiguinnarsinnaallugu, kisianni oqarusuppunga uunga suliamut tunngatillugu paasinngisakka arlaliupput.
- Suna paasinnginnakku?
- Taamatut tunuartitaaninnut suna tunngavippiarineraa, assigiinngitsunik aamma saqqummiussisoqarami, mianersortumik oqarpunga: suleqatigiittoqarsimasoq ilimagaara, uani oqanngilanga qanimut suleqatigiittoqarsimasoq. Taamak oqanngisaannarnikuuvunga. Oqaaseqaatigisimasakka tamarmik folketingip nittartagaanniit aaneqarsinnaapput.
Aamma atuaruk Nickip Naalakkersuisunik tikkuartuisimanini soraarsitaassutigigaa
- Taamatut oqarnerit sooq taamatut kinguneqassangatippiuk? Sooq taamarsuaq killiffeqartoq?
- Naluara, taannaana aamma paasisinnaanngikkiga. Sooq naqqiissuteqassasunga, Kimmi inuiaqatigiillu oqaluttuullugit suleqatiigiittoqarsimannginneranik. Taanna paasinngilaq. Naalakkersuisut danskit nunanut allanut naalakkersuisualu allallu aamma tamarmik oqaluuseraat qanimut suleqatigiittoqarsimasoq, Nick Nielsen oqarpoq.
Aamma atuaruk Nick Nielsenip soraarsitaanini paasiuminaatsippaa
Taannalu nassuiaavoq, Nunanut allanut tunngasunut naalakkersuisorlu Vittus Qujaikitsoq isumaqatigiissutigisimallugu naqqiissuteqassanani.
Siumumi siulittaasup Naalakkersuisunilu siulittaasup Kim Kielsenip ippassaq oqaatigaa Nick Nielsenip partiimut kalaallit nunaannullu aallartitatut suliassani kivissinnaasimanngimmagu tunuartitsinermut tungaviusoq.