Nick Nielsen unioqqutitsisumik soraarsinneqartutut taarsiiffigineqarnissaminut akuerineqartoq
Nick Nielsenimmi Qaasuitsup Kommuniani atorfigisimasaminut utersinnaannginnera kommunip Nick Nielsenimut ilisimatitsissutigaa, Nick Nielsenip atorfiata allamik inuttalerneqarsimanera pissutaalluni.
Aviisi Atuagagdliutit ullumi saqqummersoq taama allaaserisaqarpoq.
Nick Nielsen Naalakkersuisuunerminit tunuarnermini kommunimi sanaartornermut avatangiisinullu pisortatut atorfimminut uteqqikkusussimavoq.
Atorfigisaatali allamik inuttalerneqarsimanera Qaasuitsup Kommuniata ilisimatitsissutigaa politikeriusimasorlu atorfimmik allamik neqeroorfiginagu, tamannalu unioqqutitsisumik soraarsitsinertut isigineqarpoq.
Kingorna eqqartuussivimmut kattuffinilu aqqutigalugit suliassanngortitsivoq. Qaasuitsullu Kommunia Nunatta eqqartuussisuuneqarfianit Nick Nielsenip 1,2 millionit koruuninik taarsiivigineqarnissaanik decembarimi aalajangiiffigineqarpoq.
Kommunip eqqartuussut suliassanngorteqqippaa, tamatumalu qaqugu pinissaa Nunatta Eqqartuussisuuneqarfianit aalajangerneqarnissaa maanna utaqqineqarpoq.
