New Yorkimi ataatsimiinneq angusaqarfiulluartoq

Naalagaaffiit Peqatigiit isummersoqatigiiffiat New Yorkimi ataatsimeersuarnerani sapaatip akunnera siulleq angusaqarfiulluarpoq.

Naalagaaffiit Peqatigiit isummersoqatigiiffianni nunap inoqqaavisa ataatsimiinnerat sapaatip akunnerani qaangiuttumi ingerlanneqarpoq.
Ataatsimiinneq tallimassaanik ingerlanneqarpoq.  Nunap inoqqaavi nunasuarmit tamanit pisut 2500-it peqataapput ajornartorsiutitik qanoq qaangerneqarsinnaanerlugit oqallisigaat.

Ataatsimiinermi inuusuttut peqataasut amerlanerat malunnarpoq taakkua piumassuseqarluarput ilisimasaqarluarlutik oqallinnissamullu piareersimalluarlutik, Marianne Stenbæk New Yorkimiit ilanngutassiamini taama oqaluttuarpoq

Nunat tamat aningaasaateqarfiannik pilersitsinissamik siunnersuut tapersersorneqarluarpoq, nunap inoqqaavii nunat tamat  ataatsimeersuarneranni peqataanissamut angalanissamullu aningaasaateqarfik aningaasaliisartussaq.

Ilisimatusarfimmi tusagassiortunngorniat arfineq marluk peqataapput  taakkua ilinniarnerminnut atatillugu nunap inoqqaaviisa ataatsimeersuarnerat  pillugu suliaqarput.  Nunap inoqqaavisa pisinnaatitaaffitik pillugit ataatsimiinerat pissanganartuusoq ilinnianerminnullu atatillugu ilikkagaqarluarsimallutik tusagassiortunngorniat KNR-imut oqarput.

Canada pingaartulimmik nalunaaruteqarpoq

Ataatsimiinnermi sapaatip akunnerani siullermi pisut pingaarnersaraat, Canadami nunap inoqqaavi pillugit ministerip Caroyn Bennettip nalunaarutigimmagu,  naalagaaffiit peqatigiit nunap inoqqaavisa piginnaatitaaffii pillugit nalunaaarut Canadap ilanngunniarmagu. Maannamut Boliavia Canadalu kisiartaallutik  nalunaarummut ilanngussipput.

Nalunaarumi  alajangersarneqarpoq,  aatsitasssarsiorfinni piaaffinniluunnit nunap inoqqaavisa najugarfigissaani suliniarunik nunap inoqqaavi akuersiteqqaarneqassasut ilisimatinneqarlutillu.

Indiaanerit høvdingiat Perry Bellegarde isummersoqatigiiffimmi oqarpoq,  nalunaarut illuatungeriinnut tamanut iluaqutaajumaartoq.
- Aatsitassarsiorfiit piiaaffiillu uippallertariaqanngillat indiaanerit høvdingiat oqarpoq,

Atsitassarsiornerit piiaanerillu ineriartortinneqarnerat nunap inoqqaavisa siunissami isumaqatiginniutigisalerpatigit isumaqatiginninniarnerit nutaamik ataqqinninnerusumillu pisalisapput.

Nunap inoqqaavisa pisinaaatitaaffiit pillugit Naalgaaffiit Peqatigiit isummersoqatigiiffianni New Yorkimi ataatsimiinnerat sapaatip akunnera tulliuttoq ilanngullugu ingerlanneqassaaq.