Timersorneq

New York Timesip Arctic Winter Games tappiffigaa

Timersortunik nuannarisallit, angerlarsimallutik imaluunniit timersortunut takkullutik isiginnaarneqarsinnaasunik, ukioq manna isiginnaagassarpassuaqarput.

Allattoq Camilla Dam

januaarip 26-at 2016 16:34

Nutserisoq Tikaajaat Kristensen

Amerikamiut aviisiat ataqqisaq New York Times ukioq manna timersornermi pisussanik isiginnaarneqarsinnaasunik allattuisimavoq, Brasiliami illoqarfissuarmi Rio de Janeiromi OL-ertoqarnissaa marsillu arfernaniit aqqarngata tungaanut Arctic Winter Gamesertoqarnissaalu aviisimi allaaserineqarput.

Ukiut allortarlugit unammiuaartoqartarnera apummi pinnguarnermut nuannarisalinnut tulluartuusoq aviisip immikkut ersarissarpaa. Nuummi aputisiuserluni ooqattaarisoqassaaq, sisoraaserluni ooqattaarisoqassaaq, sisoraatinillu unamminerit assigiinngitsut ingerlanneqassallutik, Iqalunnilu Nunavummi ishockyrtoqassalluni.

- Issittormiut timersortartut inuusuttaasa unammiuaarnerat issittumi timersuutigineqartartunik aamma ilaqarpoq, soorlu Isikkanik-Marlunnik Qummut Isimmeeriarneq (Two Foot High Kick), Dene Gamesillu (Eqqillit Pinnguaataat) aamma unammissutigineqassallutik, soorlu naparummik ajattaanneq (pole, aviisip unammiuaarnerit taama nassuiarpaat.

Aamma atuaruk VIDEO AWG2016 aputissaaleqivoq

Aviisip Arctic Winter Games eqqartoreeramiuk USA-mi Europamilu golfimik unammiuaarnissaq Ryder Cup, Super Bowlilu, tassa amerikamiusut arsaattut unammiuaarneranni ajugaaniutivinneq eqqartorlugit.

KNR-imi Arctic Winter Games TV-kkut, radiokkut nittartakkullu malinnaaffigissavarput, New Yorkimiikkuit imaluuniit qanittuani maana malinnaanissannut tikilluaqqusaavutit.

Aamma atuaruk Nerrivimmi arsaarartartut inuusuttut AWG-mut piareersarput

Aamma atuaruk AWG-sertoqarnissaanut isumalluartoqaqaaq