VIDEO New Hampshireimi Trump Bernielu ajugaapput
USA-mi naalagaaffimmi New Hampshiremi qinersisoqarnerani Republikanerit qinigassanngortitaat milliardæreq Donald Trump ajugaavoq.
Donald Trump siullermeerluni ajugaavoq sapaatip akunnerani kingullermi Ted Cruzimit ajugaaffigineqarami.
Demokraatit qinigassanngortitaanni Bernie Sanders ajugaavoq.
Taamaalilluni demokraatit qinigassanngortitaat siornatigut nunanut allanut tunngasunut ministeriusimasoq Hillary Clinton ajugaaffigineqarpoq, naalagaaffimmi Iowa-mi sapaatip akunnerani kingullermi qinersisoqarnerani Hillary Clinton ajugaasoq.
Præsidentinngorniunnermut atatillugu New Hampshiremi ippassaq qinersineq præsidentinngorniunnerup inerneriumaagasaattut naatsorsuutigineqarajuttarpoq.
USA-mi præsidentimut qinersineq novemberip ulluisa arfineq pingajuanni pissaaq, maannakkut præsidentiusup Barack Obamap taartissaanik qinersisoqassalluni.