Neriuffik ukiumoortumik nuna tamakkerlugu arfininngorpat katersuiniaatitsilerpoq
- Siumut takorloorneqarsinnaasanngilaq qanoq isertitaqarsinnaasarnerluta kisianni siorna tupaallatsinneqangaatsiarpugut neriuppugullu ukioq manna aamma taamatut tapersersorneqarluarumaartugut qanimut suliarput ilisimaarinninneqarnera pillugu, Neriuffiup siulittaasua Sara J. Brandt oqarpoq.
Ukioq kingulleq katersuiniarnermi 2,5 millioner koruunit angunngeqqatarlugit pissarsiarineqarput, siulersuisullu neriupput inuit ukioq manna aamma taama tunisitigiumassasut.
Aningaasallumi atorfissaqartinneqaqaat.
Peqatigiiffik nappaassuarmik kræftimik eqqungaasimasunut ukiut tamaasa legatimik 3000 koruuninik naleqartunik tunniussisarpoq. Aamma nappaassuaq kræfti pillugu kalaallisut allakkanik atuagaaqqanik naqiterisoqarsimavoq. Oqarasuaatikkullu saaffiginniffissaqalernissaanik kattuffik suliaqarpoq.
Tamakkuinnaanngillalli, tassami:
- Nuna tamakkerlugu napparsimasut nuummut katsorsartikkiartortarnerat aammalu napparsimmavimmi suliniuteqarfigineqarnerminni siunnersuisarfimmik ammaarusulluta maannakkut suliniuteqarpugut taannalu pilersaarusiorneq Realdania suleqatigalugu ingerlapparput, Neriuffiup siulittaasua Sara J. Brandt oqarpoq.
Nuna tamakkerlugu katersuiniarneq KNR-ikkut aallakaatinneqassaaq Ilisimatusarfimmilu ingerlanneqassalluni.