Neqimi ukiormanna toqoraaneq naammassilluartoq
Sulisut 80-it toqoraanerup nalaani suliassaqartinneqarsimapput.
- Nuannaarutigivarput sulisussat tamaasa maangaanniit pissarsiarisinnaasimagatsigit, ukiormannalu sulisugut pinngitsoqaratik tunniusimalluinnarlutik toqoraanermut suleqataasimanerat nuannaarutiginngitsoorsinnaanngilarput, suliffissuup pisortaa Kunuk Albechtsen taama oqarpoq.
Naammasseriikkanik nioqqutissiorneq agguinerlu sapaatit akunnerata tulliani aallartinneqassaaq, naatsorsuutigaalu inuit 20-t ukiup sinnerani sulisorissallugit.
Savaaqqat ikinnerusut, savallu amerlanerusut
Savaaqqat ukioq manna toqorarneqartut 20.000-iupput - siornamut naleqqiullugu 200-t sinnilaarlugit ikinnerullutik. Taamaattoq savanik toqoraaneq malunnaatilimmik qaffariaateqarfiuvoq, siorna 1522-iusinnarlutik ukioq manna 2258-iullutik. Aammattaaq nersussuit 29-t toqorarneqarput, siorna 19-iusimallutik.
Suliffissuup pisortaa naapertorlugu, savaaqqat ikinnerulernerinut savallu amerlinerinut savaatillit arlallit savaateqarnermik inuussutissarsiuteqarnermik unitsitsisimanerannik peqquteqarpoq.