Pinngortitaleriffik saarulliit pillugit siunnersuuteqarpoq

Pinngortitaleriffik siunnersuuteqarpoq, saarulliit Nunatta sineriaanut qanittuani, 12.379 tonsit aappaagu pisarineqassasut. Taamaalilluni ukioq manna pisarineqartut assiginik pisassiinissamik, Pinngortitaleriffik siunnersuuteqarluni.

Tunup avataaniit Qaqortup avataa takillugu, sinerissamullu ungasissumi, tassa avataani saarullinniartarneq pillugu Pinngortitaleriffik siullerpaamik siunnersuuteqarpoq, tassalu tamaani saarulliit 7.577-it aappaagu pisarineqarsinnaasut siunnersuutigilugu.

Kujataani qangali saaarullinniartoqartarpoq

Tamaanili aalisartarneq nutaatut isigineqarsinnaanngilaq tassa 2010-miit 2013 tikillugu ukiumut saarulliit 5.500 tonsit pisarineqartarmik. 2014-mi pisarineqartut 8.000 tonsit angungajallugit amerlassuseqarlutik.

Saarulliit Kujataani 1990-ikkut aallartilaarnerani tammarmatali ukiuni kingullerni amerliartoqqilersimasut, Pinngortitaleriffimmit misissuisut kalaallit tyskillu taama paasisaqarput.

Qaqortup avannaatungaani sinerissamut ungasissumi saarullinniartoqartassanngitsoq, biologit siunnersuuteqarputtaaq. 2000-ikkut aallartinneranilli tamaani saarulliit 500 tonsit missaanniitut ukiumut pisarineqartarput, taamaattorli tassa tamaani aalisaqqusinnginnermik, Pinngortitaleriffik siunnersuuteqarluni.

Saarulliit suffisarfiisa ulorianartorsiunnginnissaat pingaaruteqarpoq

Nunatta kitaani allani sinerissamullu ungasissumi, tassa avataani saarulliit suffisarfiisa piujuaannartinneqarnissaat anguniarlugu, Nunatta Kujataani saarullinniartarnissamut Pinngortitaleriffiup siunnersuineri tunngaveqarput.

Siunnersuutit ilaat tamakku pillugit Pinngortitaleriffik tusagassiortunik katersortitsinerminni, ullup qeqqata siorna nalunaaqutaq aqqanermut pisussami, tamanut tusaliunneqassapput.

Tassani aamma saqqummiunneqassallutik qalerallit sinerissamut qanittumi ungasissumilu qanoq amerlatigisut pisarineqarsinnaanerannik siunnersuutit.