Nassiussat kinguaattoornerat kattuffiup ajuusaarutigaa
Sulisut Kattuffiata 3F-ip Aalborgimi immikkoortortaani assartuinermik suliaqartut siulittaasuata tullia ilisimatitsivoq, Royal Arctic Logistics-imik aqagu ulloqeqqata siorna qulinut isumaqatiginninnialissallutik.
Isumaqatigiinngissutit, umiarsualivimmi quersuarmilu sulisut suliaminnik ulluni kingullerni marlunni unitsitseqqanerannik kinguneqartut, suunersut illua tungeriit oqaatigiumanngilaat.
- Sulisut aqagumiit suliartoqqeqqullugit ilungersorlunga qinnuigissavakka. Angallannerup kinguartoorneranik kinguneqalereernera ajuusaarutigeqaarput. Inuiaqatigiimmi tamaasa eqqorlutigik ilisimaarilluinarparput, assartuinermik suliaqartut siulittaasuata tullia, Ole Nors Nielsen, Radioavisimut oqarpoq.
Taanna napertorlugu sulisut suliaminnik unitsitsinerat pissutsinut nukillaajummernerannik peqquteqarpoq. Sunali nukillaajummiutaanersoq oqarumanngilaq.
Ole Nors Nielsenip erseqqissaannarpaa, neriulluni, aqagu isumaqatigiinniarnissat illua tungeriit paaseqatigiinnerulernerannik kinguneqassasoq, aammalu umiarsualivimmi quersuarmilu sulisut 80-it missaanniittut taanna sioqqullugu Nunatsinnut umiarsualivimmut suliartoqqinniarlutik aalajangersimassasut.
Royal Arctic Line-mi attaveqarnermut pisortaq, Jakob Strøm, ullumi ilisimatitsivoq, taama pisoqarpat, assartugassat sapaatip-akunnerani tullermi tikittussat sivisunerpaamik ullunik marlunnik kinguartuussasut.
