Narsami seqqortaartoq: Unnerluussisussaatitaasut tarnikkut napparsimavimmiitsitsisoqalernissaa piumasaraat

Angut 21-nik ukiulik inunnik 14-inik toqutseriarsimasutut unnerluutigineqarpoq.

Angut Narsami siorna marsip 22-ani pingasunngornermi inunnut illup qalianiittunut, illumut qulimiguulimmullu seqqortaarpoq.

Eqqartuussivimmi suliaq Aarhusimi eqqartuussivimmi marsip ulluisa 18-iannit 22-anut eqqartuussissutigineqassaaq. Narsamili ukiup ataatsip missaata matuma siorna susoqarpa?

KNR-ip politiit unnerluussissutaat pissarsiaraa, tannalu angutip inuusuttup unnerluutigineqarneranut allattorsimasunik takisuunik ilaqarpoq. Unnerluussissummi 14-inut toqutseriaraluarnerit ataatsimut allattorsimapput – unnerluutigineqartunilu pissut ataatseq ”navianartorsiortitsinermut” tunngavoq.

Angut Narsami marsip 22-ani pingasunngornermi nalunaaqutaq 16.30-p 17.15-illu akornanni inummut illup qaavaniittumut arlaleriarluni seqqorpoq.

Unnerluutigineqartup qoorortuuaraq aallartiinnariaq, kaliber 17 atorpaa, inullu illup qaavaniittoq aqerlunik eqqamigoortunik ”eqqortinniarani pussimavoq”.

Inuk alla illup qaavaniittoq ”aqerluk eqqamigut saneqquasut tusaasinnaagamigit” aamma ”eqqortinniarnani puttariaqarsimavoq”.

Angut illumut pingasunik inoqartumut arlaleriarluni seqqorsimasutut aamma unnerluutigineqarpoq. ”Igalaaq aqerlumit ilaatigut aserorneqartoq, iigarlu aqerlumit eqqorneqarsimasoq” unnerluussissummi allassimavoq, inuillu taakku illumit qimaasariaqarsimapput. Pissutsimi tassani illumut seqqortaarnermut atatillugu toqutseriarsimasutut unnerluutigineqanngilaq. Pinerluttulerinermilu inatsimmi paragrafimi sakkukinnerusumi ”navianartorsiortitsinermut” tunngasumi unnerluutigineqarluni.

Qulimiguulimmut seqqortaartoq

Angut qulimiguulimmi ingerlatsisumik toqutseriarsimasutut aamma unnerluutigineqarpoq. Qulimiguulimmik ingerlatsisoq qulimiguulimmi GL 3333-mi miliivilluinnartumiippoq. Qulimiguulimmi issimasut aamma suli issimapput.

Unnerluutigineqartoq qoorortuuaraq aallartiinnariaq atorlugu qulimiguullip tungaanut arlaleriarluni seqqorpoq. Seqqornerillu ilaanit timmisartumi ingerlatsisup aappaata "qulimiguulimmit qimagulluni isumannaatsumut arpannerata kingorna" niua saamerleq eqqorneqarpoq.

Qulimiguulimmik ingerlatsisup aappaa unnerluutigineqartup seqqorluni qulimiguulimmik eqquinerani igalaamerngip aseqqukuanik kiinamigut eqqorneqarpoq.

Angut inuusuttoq qulimiguulimmut aallaasersornermut atatillugu qoorortuuaraq aallarteriaannaq atorlugu inunnik katillugit aqqanilinnik toqutseriarsimasutut unnerluutigineqarpoq.

Gummigedimut seqqortoq

Angutip inuusuttup unnerluutigineqarnerani qulimiguulimmut seqqortaarnermi aqqanilinnut toqutseriarnerit illullu qalianiittunut marlunnut toqutseriariarnerit katillugit 13-iupput. Toqutseriartutut unnerluutiginninneq kingulleq gummigedimik ingerlatsisumut toqutseriarneruvoq.

Angut qulimiguulimmut seqqortaarnermi kingorna gummigedimut seqqorpoq. Igalaaq saavaniittoq eqqorneqarpoq, igalaarlu angutip gummigedimik ingerlatsisup kiinaanut sequmippoq, ”taamaalillunilu pineqartoq kiinaata ataatungaani kiisalu qingaata qulaatungaani kilersimasoq”, unnerluussissummi allassimavoq.

Aammattaaq scooterinik saneqquttumut qoorortuuaqqamik umersimavoq.

Oqaatigineqartutut unnerluussissut imartuvoq – taannalu 14-inut toqutseriarnerit saniatigut allanik aamma ilaqangaatsiarluni. Tillinniarnermik unnerluutiginninneq ilaatigut ilaavoq.

Angut qajassuaatsumik aallaasersornissaminut ullut marluk sioqqullugit Narsap umiarsualiviani aalisariummiittumit qoorortuuaraq aallarteriaannaq kaliber 17 – tassa ullut marluk qaangiunneranni aallaasersornermini atugaata assinga tillissimavaa. Unnerluussissut naapertorlugu tillinniarneq marsip 20-ani pivoq. Ullorlu taanna illoqarfimmi najukkami arnamut oqaatsit "Aallaammik aallilaariarl takuss" atorlugit aamma sioorasaarisimavoq.

Tamatuma saniatigut qulimiguullip igalaavinik aserorterisimasutut seqqornerillu aqerluinik ajoqusiisimasutut aamma unnerluutigineqarpoq. Tamannalu pissutigalugu qulimiguulik tamatuma kingorna atorneqarsinnaasimanani.

Pinerluuteqarsimasunut inissiisarfimmi nakuuserneq ikuallatsitsinerlu

Angut aallaasersornermi kingunitsianngua tigummigallagassanngortinneqarpoq, taannalu maannamut tigummigallarneqarsimalluni. Taanna Nuummi pinerluuteqarsimasunut inissiisarfimmi tigummineqarpoq, tassanilu inatsimmik aamma unioqqutitsisimavoq.

Unnerluussissummi naapertorlugu angutip majuartarfiit savimiusut atorlugit parnaarussap ineraa 124-mi igalaamik aseruisimavoq. Tamanna siorna oktobarip arfineq-pingajuani unnukkut pivoq.

Ulloq novembarip qulingiluaani pinerluuteqarsimasunut inissiisarfimmi allamut tunuanit qingaatigut tillussisimavoq.

Ukioq manna januaarip arfineq-pingajuani qipini equutissiarlu ikuallatsissimavai – tamatumalu kingunerisaanik "pujortitserujussuartoqarneranit pequttat ajoquserneqarlutik".

Taanna tamatuma kingunerisaanik Danmarkimi tarnikkut napparsimasunut inissiisarfimmut nuutsinneqarpoq. Tamannalu ilaatigut pissutigalugu eqqartuussivimmi suliaq Aarhusip eqqartuussiani suliarineqassaaq. Unnerluussisussaatitaasullu Danmarkimi killiligaanngitsumik tarnikkut napparsimmavimmiitsitsisoqarnissaa piumasaraat.