Narsami kalaalimineerniarfik ammaqqinneqalersoq

Narsami kalaalimineerniarfiup ammaqqinnissaa Kommune Kujallermi aalajangiunneqarpoq.
Assi © : Google Streetview
Allattoq Jonas Fievé
aggustip 12-at 2016 05:09
Nutserisoq Simon Uldum -

Kommunip Inuussutissarsiutinut ataatsimiititaliaani siulittaasup Simon Simonsenip aamma aalisartut piniartullu peqatigiiffiata ataatsimiinnerisa kingorna taama aalajangiisoqarpoq, ataatsimiinnermilu aamma erseqqissaatigineqarpoq Narsami kalaalimineerniarfiup matuneqarnissaa kommunip siunertarisimanngisaannaraa, Kommune Kujalleq tusagassiorfinnut nalunaaruteqarluni taama allappoq.

Kommune Kujalleq naapertorlugu, sulisut akissarsiassaannut aningaasaliissutit nungulersimanerisa kingunerisaanik kalaalimineerniarfik matuneqarpoq.

Taamaammat aalisartut piniartullu peqatigiiffiat juulip naalernerani ataatsimeeqatigineqarpoq, kalaalimineerniarfiup qangatut kommunip sulisuanik sulisoqanngitsumik peqatigiiffimmit ingerlanneqarnissaa neriuutigineqarluni.

Isumaqatigiissuteqartoqarsinnaanngimmalli kalaalimineerniarfik aggustip aallartinnerani matuneqarpoq.

Narsamili kalaalimineerniarfimmi sulisumik ataatsimik atorfinitsitsisoqarnissaa aalajangiunneqartoq, taannalu ukiup sinneraniugallartoq sulisorineqassasoq Kommune Kujalliup maanna nalunaarutigaa.