Narsami AWG

Arctic Winter Games aallartiinnaqaaq - tamatumuunali AWG-araq, taannalu Narsamiippoq.
Allattoq Connie Fontain
marsip 01-at 2016 11:46

"Mini AWG Narsaq"-mi pisussap siunertaraa nunatsinni pisussamut angisuumut malinnaatitsinissaq aammalu Narsami najugallit ungasikkaluaqalutik AWG-eqarneranut qanittuuusinissamik misigitinnissaat, Narsami ilinniartitsisoq pinnguaatinillu annikitsunik pilersaarusioqataasoq Avaaraq Olsen oqarpoq.

Timersornikkut piumassuseq, ataqatigiinneq kiisalu nuannaarneq Narsaq mini AWG-eqarnissaani anguniarneqarput. Taamaammat timersuutini misileereersimanissaq allatsiffigineqarsinnaasuni piumasaqaataanngilaq. Inuusuttut 13-it sinnerlugit ukiullit, inersimasut, utoqqaallu peqataasinnaapput.

- Makitsisitsinikuuvugut nunallu peqataasoqartussat tamarmik Narsami sinniisoqassasut isumagalugu, pilersaarusioqataasoq nutaarsiassanut nalunaarummi taama allappoq.

Piareersarfimmi ilinniartut nunanut peqataasunut qulingiluanut tunngasunik takussutissanik sananikuupput, taamaaliornikkut Yukon, Yamal, North West Territories, Alaska, Nunavut, Nunavik, Sapmi, Northern Alberta, Kalaallillu Nunaat pillugit ilikkagaqartoqarsinnaammat.

Aaqqissuussineq ammaanersiornermik tivanertalimmik, qullernik ikitsinermik isaanertalimmillu aallartinneqassaaq. Unammiuaarnerillu ulluni marlunni ingerlanneqassallutik.

- Naggataarnersiornermi ajugaasunut nersornaatinik agguaasoqassaaq, naapertuilluartumillu unammisimanermut akissarsititsisoqarluni, isiginnaartitsisoqassaaq, nipilersortoqarlunilu kiisalu Inuili kaffillissallunilu kaagillissaaq Avaaraq Olsen oqarpoq.