Narsami atuarfik nutarterneqareerluni 2016-imi naammassineqassaaq
Narsami atuarfiup annertuumik nutarneqarnissaa Aningaasaqarnermut Akileraartarnermullu ataatsimiititaliamit akuerineqarpoq. Taamaammat nutarterneqarnissaa maanna suliariumannittussarsiuunneqarsinnaanngorpoq, isaterneqarnissaanullu neqeroortitsinerup upernaap ingerlanerani aasalluunniit qaammataani siullerni naammassineqarnissaa naatsorsuutigineqarpoq.
Allattoq Peter Troelsen, Simon Uldum
januaarip 17-at 2014 10:56
Tamatuma malitsigisaanik nutaamik illuliornissaq nutarterinissarlu pillugit 2014-imi aasakkut inaarutaasumik suliariumannittussarsiuussisoqarsinnaalissaaq. Pilersaarutillu malillugit ingerlasoqassappat Narsami atuarfik meeqqat atuarfiattut ataatsimik affarmillu aallaavilittut nutaaliatut naammassineqarsinnaassaaq. Atuarfitsialaap aaqqissuuteqqinneranut naapertuuttumik ilusilikkamut inituumullu iluarsaanneqarnissaa allanngortinneqarnissaalu siunertarineqarpoq.
- Pilersaarutaasutut naapertorlugit atuartut tamarmik 2016-imi upernaakkut/aasalernerani Narsami atuarfimmut nutaamut isertersinnaanissaat naatsorsuutigineqarpoq, Ineqarnermut Naalakkersuisoq Siverth K. Heilmann nassuuaavoq.
