Narsami aalisakkanik tunisassiorfik aallarteqqinneqassaaq
Narsami suliffissat pillugit isumasioqatigiinnermi peqataasut tassaasut sulisitsisut, kommunalbestyrelsimut qinikkat suliffissaaleqisullu kiisalu Namminersorlutik Oqartussat kommuninilu atorfilittat taama inerniliipput.
- Aalisakkanik suliffissuit pigereerpagut, taamaammat pisassinneqarpata taavalu tulaaffigineqalerlutik ingerlatiinnavik suliffippassuarnik pilersitsitsisinnaasut paasereerpagut, Simon Simonsen, Kommune Kujallermi Inuussutissarsiornermut Suliffeqarnermullu Ataatsimiitsitaliap siulittaasua, Simon Simonsen taamatut oqarpoq.
Narsaq inuussutissarsiornikkut ingerlanerluttoq
Narsaq ukiut qulit kingulliit inuussutissarsiornikkut ingerlanerluppoq tamannalu suliffissaaleqinermik kinguneqarluni. Tamanna akiorneqassappat, illoqarfiup aalisakkanik tunisassiorfiata ineriartortinneqarnissaa, isumasioqatigiinnermi peqataasut kissaatigaat.
- Neriuutigeqaarput Narsami aalisakkanik tunisassiorfimmut tulaassassanik suliarineqaqittussanillu pisassiinissaq siullermik taanna 5000 tonsinik akueriumaneqarsinnaassasoq, tassami paasereerparput maani aalisakkanik suliffissuit ingerlasut aqqutigalugit avatinnguatsinni saarullippassuaqartoq, Simon Simonsen oqarpoq.
Ukiumut 4-5000 tonsit missaat tulaassanngorlugit pisassiissutigineqarpata naatsorsuutigineqarpoq suliffiit 75-it pilersinneqarsinnaasut.
Aamma atuaruk Naalakkersuisut Narsami suliffissaaleqisut immikkut ittumik suliniuteqarfigileraat
Naalakkersuisunit qanittukkut neriorsuutigineqarpoq, Narsami inissianik isaterinermut suliffissaaleqinerullu akiorniarneqarneranut aningaasat 50 millioner koruunit atorneqassasut.
- Taakkua 50 mio. kr.-it aningaasaliissutigineqartut ingutserineriinnarnut assigisaanullu atornagit aamma inuussutissarsiutinut pilersitsitsinissanut suliffeqarfinnut ataavartunut pilersitsitsiviusussanut ilaasa atorneqarsinnaanissaat ammaaffigeqqullugu, Simon Simonsen taama oqarpoq.
Isumasioqatigiinnermi aamma isumaqatigiissutigineqarpoq Nanortalimmi apriilimi isumasioqatigiittoqaqqissasoq tassanilu Narsami ataatsimiinnermi inerniliussat nalilersorneqassallutik.
