Naqinnernik ilisarsisinnaanngitsut Sisimiuni atuartinneqassaarput
Ilinniartitsisunik amerlanerusunik højskolip pisariaqartitsinerata Namminersorlutik Oqartussat aningaasaliisinnaannginnerannik tamanna peqquteqarpoq.
- Atuartitsisarnerput unitsiinnarneqartariaqalerpoq akissaqartinnginnatsigu, Knud Rasmussenip Højskoliata pisortaa Lise Lennert Olsen taama oqarpoq.
Aammattaaq Højskolip oqummik eqqugaanerata kingunerisaanit ilarujussuata matuneqartariaqarsimavoq. Tamatumalu kinguneranik sinittarfiit ilinniartunit atorneqartartut 50-iusut affapajaavi matuneqartariaqalerlutik.
Ilinniartut ikilinerisa kinguneranik aningaasaliissutit ikilineqarput
Taama pisoqarnera højskolimut kingunerluuteqarpoq. Tassami Namminersorlutik Oqartussat ilinniartumut ataatsimut ukiumut 300.000 koruunit akiliutigisarpaat. Ilinniartut ikilerujussuarnerisa kinguneranik aningaasaliissutit ikilineqartariaqarsimapput.
Kommunit ilinniartullu akileeqataasarput massakkullu aningaasaliissutit naammanngillat. Taamaammat højskolip siulersuisui Namminersorlutik Oqartussanut qinnuteqarput ilinniartut akiliutigisartagaat qaffaaffigiumallugit.
- Ilinniartumut ataatsimut akiliut, sapaatip akunneranut kommunip ilinniartullu nammineq akiliutaat 400 koruunit sinnilaaginnartarpaa. Taanna akikippallaarujussuarmat siulersuisut tallimanngormat saaffiginnissuteqarput Namminersorlutik oqartussanut, sapaatip akunneranut akiliut inassutigalugu qaffanneqassasut, Lise Lennert Olsen oqarpoq.
Højskolip pisortaata aamma uggoraa ilinniartitsisut marluinnaat ukiumut atuartitsisarnerat. Pisariaqartitsinermi annertoorujussuummat.
- Sapaatip akunnerini 36-usuni atuartitsisarneq ukiumut naammanngilaq. Atuartuutigisartakkavut ersinngitsunik innarluuteqartuupput, naqinnernik ilisarsisinnaanngitsut ukiunilu kingullerni maani illoqarfimmi isertitsivinniittut atuartittarlutigit, Knud Rasmussenip Højskoliani pisortaq nassuiaavoq.
Radioaviisip Ilinniartitaanermut naalakkersuisoq Nivi Olsen paasiniaaffigaa naalakkersuisoqarfik aaqqiissutissamik ujartuinersoq.
