Napaattooq: Pipallatamik aaqqiisoqassanngilaq

Diskobugtimi timmisartumik annaassiniartartoqalersinnaanera pillugu Attaveqarnermut naalakkersuisup Jens Napaattuup pingaartippaa pipallatamik aaqqiisoqassanngitsoq.

Diskobugtimi annaassiniarsinnaasumik timmisartoqalersinnaanissaq innuttaasunit kissaatigineqartuartarsimagaluarpoq, ajoraluartumillu sapaatip akunnera kingulleq alianartumik pisoqarpoq.

Angut 21-nik ukiulik umiatsiaaqqamik Ilulissanit aallarpoq, kingornalu ujaarineqalerluni, Air Alphamiillu takuneqaraluarpoq kivitsissuteqannginnamillu qimaannartariaqarsimavaat, kingornalu ujarneqartoq nanineqanngilaq.

Air Alphap pisortaata tullia Ole Dorph timmisartumik kivitsissutilimmik peqalernissamut ullumi neqerooruteqarpoq, pisaarsinnaanissamullu qaammatit marluk piareersarneqaqqaartussaanerarlutik, tamanna 3 millioni koruuningajannik aningaasartuutaassasoq Ole Dorph oqarpoq.

Attaveqarnermut naalakkersuisup Jens Napaattuup aningaasartuutaasussat nassaarisinnaannginnerarpai, timmisartullu Air Alphatut ittut aqqutissaasorinngilai.

Pisoq imaannaanngitsutut nalilerpaa pipallatamillu aaqqiisoqassanngitsoq erseqqissarlugu.

Attaveqarnermut naalakkersuisup Jens Napaattuup Air Alpha sisamanngorpat ataatsimeeqatigissavaa.