Nanortalimmi akikitsuerniarfik ingerlalluarpoq
Nanortalimmi Pilersuisup niuertarfik akikitsunik tuniniaasoq qaammatit marluk matuma siorna ammarpaa, ammarnermilu kingorna naatsorsuutigineqareersutut maannamut angusaqarfiusoq, Pilersuisup pisortaa Niels Erik Petersen oqarpoq.
- Takusinnaavarput siornamut naleqqiulluta massakkut tunisaqarnerunerput, tamatumali aningaasaqarnermut sunniutai maannangaaq oqaatigiuminaapput, Niels Erik Petersen oqarpoq.
Nanortalimmi niuertarfimmik akikitsunik tuniniaasumik ammaaneq unammillertaanut Brugsen-imut pitsaasumik kinguneqartoq, nunatsinni Brugsen-it pisortaat Olav Thomsen oqarpoq.
- Pilersuisup pisiniarfiata akikitsuerniartup ammarnerata kingorna Nanortalimmi Brugsen-imut pisiniat amerlipput, Pilersuisup pisiniarfiata akikitsuerniap tunisamigut pitsaannginnerunera pissutigalugu, Olav Thomsen erseqqissaavoq. Aamma oqarpoq Nanortalimmi Brugsenip amerlanerusunik qinigassaqartitsinera tamatumunnga peqqutaasoq.
- Niuertarfiit akikitsunik tuniaasut periarfissarissaarpallaanngitsut oqaatigineqarsinnaavoq, akikitsunik tuniniaasut pisisussanik amerlasuunik pisariaqartitsinerat pissutigalugu. Taamaattumik pisiassat akikitsut tuniniarnerisa saniatigut amerlanerusunik qinigassaqartitsinissaq pisariaqarpoq, Olav Thomsen oqarpoq.
