Nanortalik psykologissaaruppoq

Narsami kommunalbestyrelsep ataatsimiinnermini kingullermi aalajangerpaa, Nanortallip kommunealu tarnit nakorsaqarnikkut suleqatigiinnertik unitsissallugu. Tamannalu Narsami tarnit nakorsaannik maannakkut annertuumik atorfissaqartitsinermik pissuteqartoq, Narsami Isumaginninnermut Ataatsimiititaliap siulittaasua Orla Rødgaard oqarpoq.

- Narsami meeqqat aqqanillit kinguaassiuutitigut atornerlunneqarnerata kingunerisaanik meeqqat pineqartut ilaqutaasalu tarnit nakorsaannik sapaatip akunnerani ataasiarlutik oqaloqateqartarnissartik pisariaqartippaat, taamalu ikiorserneqarnerat ukiuni marlunni suli ingerlagallassaaq, Orla Rødgaard oqarpoq. Tamanna pillugu Narsami tarnit nakorsaata ukiumut qaammatini marlunni pingasuniluunniit Nanortalimmiitinneqartarnera taamaatinneqarpoq. Nanortallip kommuneani Isumaginninnermut Ataatsimiititaliap siulittaasuata Kristine Raahaugep tarnit nakorsaqarnikkut Narsap kommuneanik suleqateqarnerup unitsittariaqalernera kipiluttunartuunerarpaa:

- Taama aalajangerneq assut ajuusaarnarpoq, aappaagumi nakorsap Nanortalimmukartarnissaa aamma pilersaarutaagaluarmat, maannartarneralu iluatsittorujussuugaluarpoq, Kristine Raahauge oqarpoq.

Nanortallip kommuneani allatut aaqqissuussisariaqalissallutik oqaatigaa:

- Tassa inunnik isumaginninnermi siunnertit siunnersuinermi tamakkiisumik maanna atorneqalissapput, pinartoqartillugulu tarnit nakorsaannik tikisitsinissamik qinnuteqartarnermut utertariaqassaagut. Aamma Nanortallip Danmarkimi illoqarfittut ikinngutaa saaffigilersaarparput.

Nanortalimmi innuttaasut pisariaqartitsisut saniatigut tarnimikkut innarluutillit nappaateqartullu 28-it missaanniittut tarnit nakorsaannit oqaloqateqartarnerat unissaaq, sullissisuisalu pikkorissartinneqartarnerat aamma unittariaqassasoq Kristine Raahauge oqarpoq. Taakku saniatigut meeqqat angerlarsimaffiup avataanut inissinneqarsimasut 30-it missaaniittut kiisalu sumiginnagaasartut ilaqutaasalu tarnit nakorsaannik oqaloqateqartarnerat aamma unissaaq.

Kristine Raahaugep oqaatigaa tarnit nakorsaannik kalaallisut qallunaatullu oqaasilimmik Nanortallip kommuneata pissarsiniarnissaa ajornakusoornissaa ilimagigini.