Nannut timmissat manniinik neriniartalersut
Norgemiut Issittoq pillugu misissuisoqarfianni timmissanik nannunillu ilisimatusartut Norgemi pinngortitaq pillugu ilisimasatusarfik sullissiviillu allat suleqatigalugit misissuineranni nutaami tamanna paasinarsivoq.
Svalbardimi Kongsfjordip pigisaani timmissanik assigiinngitsunik arlalinnik ukiuni amerlasuuni nakkutilliisoqarneratigut aammalu nannunik Svalbardimi sumiiffinni assigiinngitsuni sisamani Tunumilu sumiiffimmi ataatsimi 1970-ikkunnit maannamut aasakkut malittarisaqarnikkut tamanna paasineqarpoq.
AAMMA ATUARUK Imminut illersorniarluni nannut aatsaat taama amerlatigisut toqunneqartariaqarsimasut
Sikusarnerata annikillinera pissutigalugu nannut nuna nerisassarsiorfigisalerpaat, mitillu, nerlerit naajallu manniinik annertuumik nerisaqalersimallutik.
Silap pissusiata allanngoriartorneranut assersuutissaalluartoq
- Nannut manninnik neriniartalersimanerat silap pissusiata allanngoriartornerata Issittumi pinngortitap ataqatigiinneranik allanngortitsisinnaaneranut assersuutissaalluarpoq, Norgemiut pinngortitaq pillugu misissuisoqarfianni suliniummik aqutsisuusoq, Børge Moed, Norgemiut Issittoq pillugu misissuisoqarfiata nittartagaani taama allaaserisaqarpoq.
Timmissat ikilersimanerannut suli uppernarsaatissaqanngikkaluartoq, silap pissusiata allanngoriartornerata malitsigisaanik tamanna pisinnaassasoq aarleqqutigaa.
- Nunarsuup silaannaata kissatsikkiartornera assigiinngitsorpassuarnik sunniuteqassaaq, Issittup sikusarnera annikillissaaq, nannut puisinniarnissaat ajornakusoornerulissaaq timmissallu erniornerat aamma ajorseriaateqassalluni. Misissuinermi paasineqartoq soqutigineqartoq alla tassaavoq nannut naleqqussarsimarpasimmata. Timmiaqarfinni manniit neriniarfigisinnaallugit ilikkarsimavaat, piffissarlu ivaffiusoq angumeriniarlugu ukiuni kingullerni qulini timmiaqarfiit siusinnerusukkut tikittalersimavaat manninnik sapinngisamik amerlanerpaanik pissarsinissartik anguniarlugu, Børge Moed taama oqarpoq.
Ilimatusarnikkut paasisat atuagassiami «Frontiers in Ecology and Evolutionimi» qanittukkut allaaserineqarput, paasisallu Canadami assinganik ilisimatusarnermut naapertuuttut naqissuserneqarluni.
