ASSIT Nannut qungasequsersukkat timaasigullu aappalaartumik normulersukkat
Nannut arnavissat qulit qaammataasanut nassitsissutilerneqarput qungasequtsersorneqarlutik, allallu angutivissat inersimasut inuusukaajunerusullu siutaasigut mikisunnguanik nassitsissutilersorneqarput. Pinngortitaleriffimmilu ilisimatuut taamaasillutik nannut sumiiffimmi tassani angalanerat malittarisinnaanngorpaat.
Ilisimatuut pisortaata Kristin L. Laidrep ilisimatooqataasalu nannut Tunup kujasinnerusortaani ingerlaartarnerat pillugu paasissutissanik sukumiinerusunik pissarsinissartik qilanaarivaat. Ilisimatusarnikkut suliniut akisuupilussuuvoq, taamaammat sumiiffimmi piniartut qinnuigaat mianersoqqullugit.
- Qaammataasanut nassitsissutit nannunut qungasequtsiunneqartut immikkut tamarmik 150.000 koruunit missaannik akeqarput, taamaattumillu nannut nassitsissutilerneqarsimasut pisarinaveersaarnissaat pingaartuuvoq. Nanoq nassitsissutilerneqarsimasoq timimigut qalipaammik erseqqilluinnartumik normuligaasarpoq, Pinngortitaleriffik tusagassiorfinnut nalunaaruteqarluni taama allappoq.
Normuliussat nanup timaani ersilluartarput, aappaluttuullutik. Nannut qaammataasanut nassitsissutilerneqarsimasut qaqortumik qungasequtsigaasarput, allallu arnavissat angutivissallu siutimikkut nassitsissuteeraligaasarput siggummikkullu kakiorneqartarlutik.
Aamma atuaruk Ilisimatuut nannut angalaartarfiinik misissuilersut
Nannut kisinneqarnissaannut tunngatillugu ingerlaartarneri pillugit paasissutissat soqutiginaateqarput.
- Paasissutissat pissarsiarineqartussat Tunumi nannut pillugit biologit siunnersuisalernissaannut, qularnanngitsumillu tappavani nannunniartarnerup aqunneqalernissaanut atorneqassapput, Pinngortitaleriffimmit taama oqatigineqarpoq.
Nanorli nalunaaqutsigaasimasoq pisarisoorsimagaanni Pinngortitaleriffimmeersut attavigineqarnissartik kissaatigaat.