Nannut pillugit iliuusissiaq isumaqatigiissutigineqalersoq
Nunat Issittumiittut ataatsimoorlutik nannut pillugit iliuuseqartariaqarnerat 1973-imili isumaqatigiittoqarpoq.
Tamatuma kingunerisaanik nunat nanoqarfiusut tamarmik nannut pillugit aqutsinissamut illersuinissamullu isumaqatigiissummik taamani atsiugaqarput. Danmarki Kalaallit Nunaat sinnerlugu taamanikkut atsioqataasuuvoq.
- Nannut pillugit, Circumpolar Action Planimik taaguutilik, tassaavoq nannut pillugit Issittoq kaajallallugu iliuusissiaq, taanna ukiuni kingullerni marlunni suliaasoq Ilulissani inaarsarneqassaaq akuersissutigineqarlunilu, Piniarnermut Naalakkersuisoqarfimmi allaffimmiu Heidi Mary Hansen oqarpoq.
Nanoqatigiit misissuiffigineqarsimasut amerlanersaat ikiliartortut paasineqarnikuusoq taassuma ilaatigut oqaatigaa. Silap pissusaata allanngoriartornera Issittumilu sikkorluttalernera nannunut siunissami eqquinerlorujussuarumaartut aamma ilimagineqartoq aarleqqutigalugu.
Nannut ilisimatusarfigineqarnerat nukittorsarniaraat
Taamaammat isumaqarpoq Issittumi nunat suleqatigiinnerisigut, tamatumuungalu nannunik piujuaannartitsilluni ingerlatsinerup nukittorsarnissaa, kiisalu ilisimatusarnerup nakkutilliinerullu ataqatigiissaagaanerusumik ingerlalernissaat pingaaruteqartuusoq.
- Nannut pillugit piumasaqaatitta suleqatigiillutalu ilusilersukkatta eqquutsinnissaanut, naammassinissaanut kiisalu ilisimatusarnerup pitsaanerusumillu aqutsinerup qulakkeernissaannut tamatta immitsinnut pisussaaffilissaagut. Nannunut iliuusissiap pitsaaqutigaa nunat pisuut nukittuullu, soorlu Canada USA-lu nannut pillugit ilisimasaqarluartut misilittagaqarluartut aningaasaateqartullu nunatsinnut nannut pillugit ilisimatusarnerunissanut akissaqarpianngitsunut tunniussaqarsinnaammata, Heidi Mary Hansen oqarpoq nangillunilu:
- Tamatuma saniatigut nannuttassiisarpugut, ataatsimoortumik aqutsinikkut tunaartaqalernerup nunani ataasiakkaani nannunik aqutsinerit ersarinnerulersissavai tatiginassuserlu annerulersillugu, Heidi Mary Hansen naggasiivoq.
