Nannut immap sikuata aakkiartuinnarnera pissutigalugu ikiliartuinnartut
Tuluit nunaanni atuagassiap Royal Society's Biology Lettersip sukumiisumik misissuinerani taama inerniliisoqarpoq.
Nannut Issittumi nassaassaasut maanna 26.000-it missaanniipput, nanoqatigiinnut 19-inut aggulunneqarsimallutik. Nannulli 30 procentiisa missaat ukiuni tulliuttuni 35-ni peerussimanissaannut 70 procentimik chanceqartoq misissuinerup maanna takutippaa.
Pissutsit maannakkutut iinnavissappata 2030-kkunni aasakkut sikuusarunnaassasoq ilisimatuut eqqoriarpaat.
Sikuusarneratalu annikilliartornera ilutigalugu nannut ukiut tulliuttut 35-t 41-llu akornanni pingajorarterummik ikilissasut ilisimatuut ilimagaat:
- Immat sikuusarnerat nannunut pingaaruteqarluinnarpoq, puisinimmi annerusumik nerisaqartuupput, misissuinermi taama ilaatigut inerniliisoqarpoq.
Akuutissat toqunartortallit nannunut Issittumiittunut aamma aarlerinaateqarput. Akuutissammi nerisariinni annertusiartornerisa kingunerisaannik nannut angutivissat kinguaassiorsinnaassusiat aamma killeqalersarpoq, soorlu ullutsinni tamanna takussaalereersoq.