Nannut illoqarfinnut qaninngoortartut amerleriarujussuartut
Pinngortitaq pillugu nunarsuaq tamakkerlugu suliniaqatigiiffiup WWF-p nannunik alapernaarsuisuisa nannut Ittoqqortoormiinut qanillattornissaat pinaveersimatinniarsaraat. Tamannali ajornakusoortupilussuuvoq, nannummi Ittoqqortoormiit illoqarfittaanut pisartut siornatigumut naleqqiullugu akulikilligaluttuinnarput.
- Nannunik alapernaarsuisut qaammatit pingasut ingerlaneriinnaani nannunik 20-nit amerlanerusunik siumuipput. Tamannalu Kalaallit Nunaanni 2012-imi nannunik qaninngoortunik siumuisoqarnerata marloriaatigaa, Pinngortitaq pillugu nunarsuaq tamakkerlugu suliniaqatigiiffimmi suliniutinik aqutsisoq uumassusilinnillu ilisimatooq Kaare Winther Hansen taama ilisimatitsivoq.
Aamma atuaruk Ittoqqortoormiini nannuttassiissutit tamakkerneqarput
Aamma atuaruk Nunavumi nannunik aamma ajornartorsiuteqarput
Nannunik alapernaarsuineq illoqarfeeraq 400-t inorlugit innuttaasoqartoq suleqatigalugu ingerlanneqarpoq. Atuariartortut suliartortullu isumannaallisarniarlugit alapernaarsuisut illoqarfimmi ullut tamaasa angalasarput. Nannulli qimaatikkuminaatsupilussuupput, tamannalu pissutigalugu imminut illersorniarluni nannunik toqutsisarnerit amerliartorput.
WWF naapertorlugu paasissutissat
- Nannut nunarsuaq tamakkerlugu 22.000-it 31.000-illu missaanniipput.
- Nunani tamalaani avatangiisit pillugit suliniaqatigiiffimmit IUCN-mit nanoq “mianernartutut” nalilerneqarpoq.
- Nunatta kitaani 2.200-t missaannik nanoqarpoq, Tunumili amerlassusaat ilisimaneqarani.
- Silaannaap kissatsikkiartornerata sakkortussusaa taamaaginnassappat, ilisimatuut malillugit ukiuni tullerni 100-ni nannuerutivissinnaanera aarlerinaateqarpoq.
- Nunatsinni nannunik alapernaarsuisut ilaatigut inuinnarnit WWF-imik tapersersuisunit aningaasalersugaapput.
Nannut suli amerlanerusut toqunneqartariaqarsinnaapput
Nannunik qaninngoortunik toqutsinerit 2014-imi amerlanerpaapput, taamanimi imminut illersorniarluni nannut aqqaneq-marluk toqunneqartariaqarsimapput. Ukioq mannalu ukiuunerata issaasannerunera pissutigalugu nannut nunakkoortut suli amerlanerunissaat Pinngortitaq pillugu nunarsuaq tamakkerlugu suliniaqatigiiffiup WWF-ip ernumassutigaa.
- Ukiuunerani imaq sikuallaanngilaq aamma siusissukkut sikuerpoq, taamaammat nannunik qaninngoortunik ukioq manna suli amerlanerusunik toqutsisariaqartoqarnissaa ilimagaarput. Taamaammat alapernaarsuisut atortulersorlugit maannakkorpiaq piareersarpagut. Suliassarmi ulorianarsinnaavoq, Kaare Winther Hansen oqaluttuarpoq.
Aamma atuaruk WWF: Namminersorlutik Oqartussat suleqatigerusuppavut
Alapernaarsuisut gumminik imassaliat, ajunaalernermi kalerrisaarutit ATV-lu atorlugit nannut qimaatinniartarpaat. Illoqarfinni allani alapernaarsuisussanik pilersitsinissaq WWF-ip maanna isumaliutigaa, generalsekræterilli erseqqissaatigaa alapernaarsuisoqarneq allatut iliuusissaarulluni iliuuseqarneruinnartoq.
