Piniarneq Nannunneq puigunaatsoq

Assai qiviaannarlugit piniartuusoq eqqoriaruminarpoq. Assaallumi taakku maanna inuusoqisut, utoqqaligunik ernuttaminnut oqaluttuassartaqarput.

- Nannunnera oqaluttuariumaarpara, Henning Fleischer qungujulalluni oqarpoq.

Henningi ataatanilu februarip ulluisa qulingiluaani ullaakkut qilalugarniarlutik avalapput, nanuuserlutilli uterput.

- Ingerlaarlutaana siku sinerlugu takugatsigu sikumi pangalittoq, ungasianinngaanniit takugatsigu tungaanut ingerlaannaq aallarsaratta, sikumut taliusaannarlutalu pisarigatsigu. Ataaseersimagakku nikeqqinngilaq, Henning oqaluttuarpoq.

Piniartorsuaq

Henning inuusuttuuvoq piniartoq 26-inik ukiulik, piniagassanilu qilalugaq qernertaq kisiat pisarissallugu amigaatigiinnalerpaa. Nannunninilu puigugassaanngitsumik eqqaamasinnaanngorpaa.

- Nuannersorujussuuvoq, aamma kalerriillattaaratta nalunngisatsinnik nannussimasunga. Sunaaffa qilalugarsimasorigaannga kisimagooq. Pileriallaramikku nanoq sissami. Takunnittut aamma tupigusukkunarput.

Persuarsiorput

Henningip arnassaa Najaaraq, Henningillu ernera Qarsoq nuannaaqataapput.

- Eqqarput innutilerami, inupparpassuit aggikaagamik. Nanumik alakkaasorpassuit, pilluaqqusiortortut, Najaaraq oqaluttuarpoq.

Henningillumi ernera nannumik takulluni tupigisussimavoq.

- Tupigusuppunga, aamma ersigigaluarpara, Qarsoq Fleischer oqarpoq.

Perngartoornermilu ileqqorineqartartoq atorluarsimavaat.

- Kaffillertariaqalerluta, pikilluta tuaviinnaq. Takannaartariaqalerluta. Inuit nuannisangaarmata nuannisaannalerluta. Inuerunneq ajulerluta unnussuarmut persuarsiorsuaaleriataarluta.

Henning Fleischer inuussutissarsiutigalugu piniartuuvoq.