Nannumik takusoqaqqittoq – kujataani qinikkap nannuttassat amerlerusukkai

Nunatta kujataani nannut sisamat ukiumut pisarineqarsinnaapput. Taakkulu naammanngitsut, Siumumit, Anders Olsen isumaqarpoq.

Allattoq Christine Hyldal, Jørgen Semionsen

marsip 20-at 2024 15:45

Nutserisoq Connie Fontain

Qaqortup eqqaani nannut marluk sapaatit akunnerisa pingasut ingerlaneranni siumorneqarput. Nanoq februaarip ulluisa 27-anni illoqarfimmi angalaareerluni aallaaneqarpoq. Qaqortumilu sikorsuarni nannumik marlunngornermi siumuisoqaqqippoq. Nanorli illoqarfiup illuata tungaanut qimaavoq.

Assi umiarsuarmit pilersuummik Arpaarti Arcticamit assilisaavoq.

Siumumiilli Anders Olsen naammatsippoq. Nunattami kujataani nannut sisamaannaat ukiumut aallaaneqaqqusaapput – taakkulu naammanngitsut, politikeri isumaqarpoq.

- Isumaqarpunga nannuttassanik ilasisoqartariaqartoq, maannakkumut taakkua pisassat sisamat tamakkerneqareermata, taanna oqarpoq.

- Sisamaniit amerlanerusunik, marloriaataasinnaapput imalluunniit qulit aqqaneq-marlulluunniit, taakkua nannuttassiissutigineqartalertuuppata Kujallermut qularnanngilaq taanna piniartutut inuussutissarsiutilinnut ilaqutariinnullu assut iluaqutaangaatsiassagaluarpoq.

Kommune Kujallermi nannuttassiissutit sisamaasut – Nanortalimmut, Qaoqrtumut, Narsamut nunaqarfinnullu atuuppoq.

QANOQ ILINERANI NANNUTTOQARSINNAAVA?

Nannunik piniarneq illersuinerlu pillugit nalunaarut naalakkersuisut marsi 2023-mi allanngortippaat.

Nannunik ajornartorsiutaasunik toqutsisoqassappat Aalisarnermut Piniarnermullu Naalakkersuisoqarfimmit akuersissuteqaqqaartoqartariaaruttoq nalunaarummi nutaami allaqqavoq.

Nannut ajornartorsiutaasutut isigineqartut tassaapput inoqarfinnut qaninngoortut, qimaatinneqarniareeraluarlutillu suli qaninngoortut.

Nanoq ajornartorsiutaasutut nalilerneqartoq inuussutissarsiutigalugu piniartumit atuuttumik akuersissutilimmit toqunneqarsinnaappat nannuttup pigiinnassagaa ilanngunneqarpoq.

Inuk imaluunniit inuit inuunerat ulorianartorsiortinneqarpat pisariaqavippallu nanoq toqunneqarsinnaajuaannarpoq.

Aallerfik: Naalakkersuisut

Allisiguk

Anders Olsen Kommune Kujallermi taamaallaat qinigaanngilaq. Taanna Inatsisartuni aamma ilaasortaavoq. Nunatsinnilu politikerit pisassiissuteqartoqarnerussanersoq aalajangiiffigisarpaat. Kujallermilu borgmesterip, Stine Egedep (IA) taakku tamanna akuersaassagaat neriuutigaa.

- Tassa pissangalluta utaqqissavarput, Naalakkersuisut qanoq qisuariarfigiumaarneraat, taanna oqarpoq.

KNR-ip aalisarnermut piniarnermullu naalakkersuisoq Kim Kielsen oqaaseqartinniarsaraa.