AWG2016 Namminneq kajumissutsiminnik sulisut kaammattorneqarput

- Uggornaraluaqisumik takkunngitsoortut arlaqarput, takkuttunummi tamaviaarnarsisitsisarmat. 
Tamannalu nalaapparput unammiuaariat siniffissaanik katiterisoqartussaatillugu. Qujanartumilli allanik sulerusuttunik sassartoqapallappoq, Arctic Winter Gamesimi pisortaq Maliina Abelsen oqarpoq.

Unammiuaartoqarnissamut atatillugu namminneq kajumissutsiminnik sulisut 1700-t missaaniipput, taakkulu AWG-p aaqqissorneqarneranut pingaaruteqartut pisortap Maliina Abelsenip oqaatigaa. 

Aamma atuaruk Nuussuup Atuarfia unammiuaarianik najugaqarallarfigineqarnissaminut piareersarneqarpoq

- Namminneq kajumissutsiminnik sulisut kaammattussagaanni isumaqarpunga pingaaruteqartoq oqassalluni unammiuaartoqarnissaq iluatsissappat tamaavimmik pingaaruteqartupilussuusut. Tamatta tunniussigutta immitsinnut tapersersussaagut. Tamarmik pingaarutilimmik inissisimapput, Maliina Abelsen oqarpoq, nangillunilu;

- Unammiuaarnerit aallartippata namminneq kajumissutsiminnik sulisut skiimatik qimerluulaartarumaaraat suliariniakkatillu imminiiginnarnagit akisussaaffik tigummilluarumaaraat neriuutigisorujussuuarput. Aamma makku aalajaallutik suleqataalluartut soorunalimi qujaffigerusuppagut, nersunaqaat.