Namminersorlutik Oqartussat suluppaakkat itigartissutigaat

Polar Seafoodilli qinnuteqaataanik Namminersorlutik Oqartussat itigartitsinerat Henrik Lethip tupigusuutiginngitsuunngilaa.

Kitaata imartaani suluppaakkanik misileraalluni aalisarnissamut Polar Seafoodip sapaatit akunneri marluk qaangiuttut qinnuteqaataa, Namminersorlutik Oqartussanit itigartimmassutigineqarmat tupigusuutigaa.

- Massakkutut itsillugu aalisakkat taakkuinnaat pisassuteqarfigineqartarput, aalisarumagaangatsigilli naaggaarneqartarpugut. Assersuutigalugu sapaatip akunneri marluk qaangiuttut kitaani suluppaakkanik aalisarnikkut misileraanissamut qinnuteqaraluaratta itigartitaavugut, Polar Seafooodip siulersuisuini siuluttaasoq Henrik Leth oqarpoq. 

- Tassalu Nunatsinnut akeqanngitsumik misileraasinnaagaluarpugut, naalakkersuisoqarfimmiilli tamanna soqutiginartinneqanngilaq. Siunnersuutitik ilumoorukkunikkit siusinnerusukkut pimoorussisariaqaraluarput.

Aalisarnermut, Piniarnermut Nunalerinermullu Naalakkersuisoqarfiup Pinngortitaleriffimmiit inassutigineqartut itigartitsinermut tunngavilersuutigaat.