Namminersorlutik Oqartussat naqqiutaanut akissut
KNR.gl-ip allaserisaanut Nunaoilimut tassanilu siulersuisut tunuarnerannut sammisaqarfiusunut Namminersorlutik Oqartussat nittartakkaminni naqqiuteqarput.
Paasissutissanulli Namminersorlutik Oqartussat saqqummiussaannut KNR-imiit naqqiuteqartariaqarpugut.
Aamma atuaruk Nunaoil qaammaterpassuarni susinnaajunnaarsinnaasoq
Namminersorlutik oqartussat erseqqissarpaat, peqqussuteqarnikkut Nunaoili sipaaruteqarnissamut pilersaarusioqqusimanagu. Aammalumi peqqususiorsimanngillat, oqaaseqaasiorsimallutilli, siulersuisut tunuartut ilumut peqqussutaasutut paasisaannik.
- Allakkani oqaaseqaammik malitseqartuni naalakkersuisoqarfiup tigussaasumik naliliinera anguniagaalu sukumiisumik nassuiarneqarsimapput, tassunga ilaallutik sulisut amerlassutsimikkut affaannanngortinneqarnissaat akissarsiallu allanngortinneqarnissaat, naak siulersuisut naliliinissaminnut alloriaatissanullu periarfissinneqanngitsut, Nunaoilimi siulersuisunut ilaasortat sisamat tunuartut allapput.
Tamanna tunuliaqutigalugu naqqiutigissavarput, peqqusisoqanngimmat oqaaseqaasiortoqarlunili, peqqussutitut paasineqartumik.
Namminersorlutik Oqartussani Ingerlatseqatigiiffinnut Allattoqarfimmi “paatsiveerusimaartoqarneraaneq”, Namminersorlutik Oqartussat aamma orullutigaat.
- Tamanna ilumuunngilaq. Ingerlatseqatigiiffinnut Allattoqarfimmi paatsiveerusimaartoqanngilaq, taamannak allanneq tusagassiortup nammineq akisussaaffigaa, Namminersorlutik Oqartussaniit naqqiinermik taasaminni allapput.
"Patsiveerusimaarneraanerli" ilumoornersoq ilumuunnginnersorluunniit soorunami aalajangeruminaatsuuvoq, kisianni allaaserisap suliarinerani, Naalakkersuisunut siulittaasuugallartoq taassumalu naalakkersuisoqarfiani pisortaq attaveqarfigaavut. taakkuali marluullutik Ingerlatseqatigiiffinnut Allattoqarfimmi pisortamut, Rasmus Pedersenimukaqquaatigut, taassumalu suliaq misissoritsik oqaluttuuppaatigut.
- Maanna suliaq misissorparput. Pisup assinganik misigisaqanngisaannarnikuuvugut. Taamaattumik pisoq qanoq suliareriassanerlugu maanna paasiniarlutigu, Ingerlatseqatigiiffiit allattoqarfianni immikkoortortami pisortaq Rasmus Pedersen KNR-imut oqarpoq.
Allannitsinni (tallimanngornermi nal. 15.00) KNR-imiit Naalakkersuisunut siulittaasuugallartumut pulaartoqaqqammerpoq, suleqativullu paasitinneqarput, pissutsit tamakkiisumik qulaarneqanngitsut, aaqqiissutissarsiortulli.
Pissutsit taamaattut siornatigut aqqusaarneqarsimanngitsut "paatsiveerusimaarnertut" oqaatigissallugit naleqquttutut nalilerparput, pissutsit Nunaoilimut qanoq isumaqassanersut akineqannginnatta.
Aamma atuaruk NunaOilip siulittaasorisimasaa: Uuliamut politikki imminut assortorfiusoq
Taava Namminersorlutik oqartussat aamma allapput, siulersuisut naalakkersuisut sisamat tunuarnerisa qinersinissamillu nalunaaruteqarnerup aqaguani tunuarnerannik allannerput kukkusuusoq.
Tikkuartariaqarparpulli, allaaserisami taama allassimasoqanngimmat. Paarlattuanik allaaserisami innersuussutigineqarpoq, Namminersorlutik Oqartussat Nunaoil oqaaseqaammik oktobarip aappaanni - qinersinissaq nalunaarutigineqarnerata aqaguani - nassiussimmata. Taava siulersuisut sapaatit akunnerat qaangiuttoq tunuarniarlutik aalajangermata, uani apeqqutaanngilaq, Namminersorlutik Oqartussat pinnatik siulersuisut iliuuserimmassuk.