Politikki Inuussutissarsiutit

Namminersorlutik Oqartussat namminersortunit akiliinerullutik KANUKOKA-p allafeqarfia pisiaraat

Namminersorlutik Oqartussat KANUKOKA-p allafeqarfia Nuummiittoq 20 million kr-nilerlugu pisiaraat, Naalakkersuisut taama uppernarsaallutik KNR-mut oqarput.

Allattoq Mads Pedersen, Inge S. Rasmussen

juulip 24-at 2016 12:19

Kommuunit kattuffiata KANUKOKA-p allaffeqarfia Nuummiittoq Namminersorlutik Oqartussanut tunineqarpoq. Tamanna pivoq namminersortut marluk assigalugit Namminerslutik Oqartusassat pisiumallutik neqerooruteqarmata, pisortat akigitinniakkamit 2 millionit koruunink akiliinerullutik.

Allaffeqarfik 18 million koruuneqartussatut nalilerneqarpoq. Namminersorlutik Oqartussat akiliiumanerpaavoq akigitinniagaq 2 millionit koruuninik sinnerlugu akiliiumagami.

Aamma atuaruk kanukoka-p-qullersaqarfia-tunineqartoq

- Isumaqarpugut allaffeqarfik taama akeqartariaqartoq, Aningaasaqarnermut Naalakkersuisoq Randi Vestergaard Evaldsen (D) KNR-mut oqarpoq.

Randi Evaldsen nassuiaateqarluni oqarpoq, allaffeqarfik Nuup qeeqqaniitoq pisiarineqarsimasoq, Namminersorlutik Oqartussat allaffeqarfii Nuummi sumiiffinni assigiinngitsuni attartukkaniitut sipaaruteqarfiginiarlugit.

Namminersortut marluk neqerooruteqartut

Namminersorlutik Oqartussat saniatigut namminersortut maluk pisinissamut neqerooruteqarsimapput.

Namminersortut marluk taakkua aappaa tassaavoq, Morten Jørgen Heilmann timersuutinik nioqquteqarfimmik Pikkori Sport-imik Nuummiittumik piginnittoq.

Annerpaamik neqerooruteqartoq ajugaammat, taassuma paasisinnaanerarpaa, allaffeqarfilli illoqarfiup qeqqani pilerinartumiittoq, pisortat aningaasaataaannik namminersortut unammillerneqarmata uggornartillugu.

- Pisisussarsiorneq isornaatsumik ingerlavoq. Uggornaraluartuali tassaavoq annerpaamik neqerooruteqartoq KANUKOKA-p toqqarmagu, Morten Jørgen Heilmann KNR-imut oqarpoq.

Taassuma erseqqissaatigaa, illoqarfiup qeqqani sanaartukkat tuniniarneqartut ikittuinnaammata, pisortallu allaffeqarfii suliffinnik nutaanik namminersortut pigisaannik pilersitsinngimmata.

- Namminersorlutik Oqartussat allaffeqarfimmik pisinerisigut assersuutigalugu takornariaqarnermi suliffinnik nutaanik annertunerusumik pilersitsisoqanngilaq, Morten Jørgen Heilmann oqarpoq.

Namminersortut neqerooruteqartup aappaa, tassaavoq Kirsten Lynge taanna akikinnerpaamik neqerooruteqarsimalluni KNR-imut nalunaarutigaa, taannalu Morten Jørgen Heilmannip isummersuutaanut isumaqataavoq.