Namminersorlutik Oqartussat ingerlatseqatigiiffiutaat allannguuteqassapput

Naalakkersuisooqatigiilersussat Namminersorlutik Oqartussat ingerlatseqatigiiffiutaat malunnaateqartumik allannguuteqartitsinissaannik piumaffiginninniartut, Siumut Atassut Demokraatillu isumaqatigiissutaanni allassimavoq.
decembarip 08-at 2014 17:02

Aamma suleqatigiilersut isumaqatigiissutaanni ilaatigut allassimalluni, piginneqatigiiffinni siuttut Nunatsinni najuagaqassasut, taamatullu pigineqatigiiffiit ilaat namminersortunngortinneqarnissaannik siunniussaqartut allassimalluni.

 

Taamatullu pisortat ingerlatseqatigiiffiutaanni siuttoqarnikkut sukaterisoqassaaq.  Siulersuisuni ilaasortani amerlanerussuteqartut Nunatsinneersuunissaat, Naalakkersuisunngortussat ilaatigut aamma piumasariniarpaat.

 

Aamma piginneqatigiiffiit pisortanit pigineqartut tamarmik Nunatsinni qullersaqarfeqalissasut piumaffigineqassapput. Taamatullu tamakkunani pisortat, Nunatsinni najugaqassasut Nunatsinnullu akileraartassasut piumasaqaataalernissaat Naalakkersuisooqatigiilersunit anguniagaavoq.

 

Taava aamma pisortat piginneqatigiifiutaat namminersortunngortinniarneqassapput. Taamaaliornikkut pisortat inuussutissarsiutinut akuliuttarneri annikillisinniarneqarluni.
 

Piginneqatigiiffiilli namminersortunngortinneqassappata aatsaat periusissanik iliuusissanillu pilersaarusiortoqareerpat taamaliortoqassaaq. Aamma pisissussanut piumasaqaatissat taavalu namminersortunngortitsiartuaarnerup sukkasussissaa isumaliutigeqqaarneqarnissaa Naalakkersuisooqatigiilersut siunniuppaat.