VIDEO & ASSIT Namminersorlutik Oqartussanut sioorasaarinermi ima pisoqarpoq
Politiit qatserisartullu Inatsisartut allaffeqarfiani sulisut qimagussortippaat kulturikkullu illorsuarmut Katuamut sulisut Nuuk Centerimilu pisiniat katersuutsinneqarlutik. Namminersorlutik Oqartussat allaffeqarfiata eqqaani tamarmik aqquserngit assersorneqarput.
Naalakkersuisut siulittaasuat, Kim Kielsen Inatsisartunilu ilaasortat arlallit politiit katersuutsitsimmata kulturitta illorsuarmi Katuameeqataapput. Inatsisartut ataatsimiititaliallu ullormut pilersaarutaat tamarmik taamaatinneqartut Inatsisartut siulittaasuata Lars-Emil Johansenip Katuameeqataatilluni nalunaarutigaa.
- Ullumi ataatsiminnissaraluagut taamaatinneqarnerisa kingorna, neriuutigaara Inatsisartut atatsimiinnerat aqagu aallarteqqinneqarsinnaassasoq, Lars-Emil Johansen Katuami paasissutissiigami oqarpoq.
Eqqissisimapput
Namminersorlutik Oqartussani pisiniarfissuarmilu sulisut nalunaaquttap akunnerini arlalialunni Katuamiipput.
Sioorasaarineq politiinit sakkortuumik qisuariarfigineqarmat tamanna Parisimi pinerliisoqarnerata kinguneranik upalumaarsimaneq sukannernerusoq atorneqartoq, politiini unnerluussisussaatitaasut ittuat Morten Nielsen KNR-imut oqarpoq.
Nalunaaqutaq ataasimut qiteqqutilersoq politiinit nalunaarutigineqarpoq aqquserngit assersorneqarneri taamaatinneqartoq. Tarnimikkut napparsimasup siorasaarisimanini nassuerutigereeraalu, upalungaarsimaneq tamarmi ataaseq qaangerlugu tanneq sisamanngortorlu taamaatinneqarpoq. Sioorasaarisoq Dronning Ingridip napparsimmavissuani tarnimikkut napparsimasut uninngavianni nakkutigineqarpoq.
Pisiniarfissuaq Aantuukasik taamalilluni ammaqqippoq.
