Namminersorlutik Oqartussanut isersinnaaneq sukateriffigineqarpoq
Naalakkersuisunut, Naalakkersuisoqarfinnut, Inatsisartunullu susassaqartut pulaarniartullu ornigunniartut tamarmik takkunnertik saaffiginnittarfimmut maannamiit nalunaarutigeqqaartalissavaat, assersuutigalugulu Namminersorlutik Oqartussani ingerlaqqinnginnerminni ingiaqateqaqqaartalissapput, soorlu aamma Namminersorlutik Oqartussanit aniartornerminni aamma ingiallorteqartalissasut.
Namminersorlutik Oqartussat siorna novembarimi sioorasaarneqarnerat pissutaalluni Namminersorlutik Oqartussat qitiusumik allaffeqarfiinut isersinnaanermut tunngasut sukateriffigineqalerput, Namminersorlutimmi Oqartusssat allakkanik sioorasaarinermik imalinnik siorna nassinneqarnertik pissutigalugu Namminersorlutik Oqartussat allaffeqarfii Nuuk Centerimilu allaffeqarfiini sulisut taamanikkut qimagussorneqartariaqarlutik. Namminersorlutik Oqartussani qitiusumik allaffeqarfiini isumannaallisaanermut Ataatsimiititaliap siulittaasua Mininnguaq Kleist taama ilisimatitsivoq:
- Siorna sioorasaarisoqareersorlu suliaq aallartipparput. Sapaatilli-akunnerani pisut soorunami aamma eqqarsaatigalugit iliuuseqarnialerpugut, pissutsimmi ullumikkut atuuttut allarluinnaapput, Mininnguaq Kleist KNR-imut oqarpoq.
Tassa Namminersorlutik Oqartussanut ornigunniartut kikkulluunniit saaffiginnittarfimmut saaffiginneqqaartalissapput, Namminersorlutillu Oqartussani ingerlaqqinniarunik ingiaqateqartalissaallutik. Akileraartarnermulli Aqutsisoqarfiup innuttaasunik sullissivia immikkut isertarfeqarmat isersinnaanermut tunngasunut atatillugu isumannaallisaaniarnerup sukateriffigineqarneranit kalluarneqassanani.
