Naluttartut Islandimut unammialersut
Nuummi Naluttartut Klubbianneersut pitsaanerit qulingiluat 'Naluttartoqatigiit Nanoq'-mik taaguuteqartut, Islandip illoqarfiisa pingaarnersaanni Reykjavik International Games 2017-imut januaarip naanerani peqataajartussapput. Nunatsinni Timersoqatigiiffiit Kattuffiat tusagassiorfinnut nalunaaruteqarluni taama allappoq.
Nalunneq timersuutitut Nunatsinni aallutaavallaanngikkaluartoq 'Naluttartoqatigiit Nanoq' unammiartussanngornerat isumalluarfigineqartupilussuuvoq. Sungiusaasoq, Henrik Fenger Jeppesen, oqaluttuarpoq naluffissap takissusia kalaallinut naluttartunut immikkut unamminartuussasoq.
Unammiuaarnerit naluttarfimmi “Laugardalur”-imi ingerlanneqassapput, tassanilu naluffissaq meterinik 50-inik takissuseqarpoq, taannalu Nuummi naluttarfimmi Malimmi naluttarfiup meterinik 25-ngajannik takissuseqartup marloriaatigingajappaa.
- Naluttartut Nunatsinneersut takinerusumut nalunnissartik sungiuttariaqassavaat, tamannalu nalinginnaasumik naluttarnerannut periaaserisartagaannullu sunniuteqassaaq.
- Tamannalu immikkut isiginiarlugu unammiuaarnissaq sapinngisamik pitsaanerpaamik piareersaateqarfigaat, aamma aallartarfimmit pissinnermik, saqinnissamik naloriaatsinillu sungiusarput, Henrik Fenger Jeppesen tusagassiorfinnut nalunaarummi taama oqarpoq.
'Naluttartoqatigiit Nanoq' Nuummi naluttarfimmi Malimmi ulluinnarni sungiusartarput, taakkulu naluttartut nunanit arlalinneersut januaarip 27-anit 29-anut unammissavaat.
Reykjavik International Games siornatigut Sverigemit, Danmarkimit, USA-mit, Savalimmiunit, Tysklandimit nunanillu allarpassuarnit peqataaffigineqartarpoq. 'Naluttartoqatigiit Nanoq'-meersut 2015-imi peqataanerminni bronzennapput. Taakku Facebookimi malinnaaffigineqarsinnaapput.
International Games 2017-imi timersuutit assigiinngitsorpassuit unammissutigineqartarput, soorlu nalunneq, atletikki, sulorarneq, sisorarneq allarpassuillu.
Greenland Badminton Federationip KNR-imut ilisimatitsissutigaa sulorartartut tallimat International Games 2017-imut peqataassasut. Tassaallutik Sara Lindskov Jacobsen Danmarkimeersoq, iluliarmiut Bror Madsen aamma Taatsi Pedersen kiisalu nuummiut Frederik Elsner aamma Jens-Frederik Nielsen.
