Nalunaarusiaq: Qaqortumi mittarfiliortoqarpat inuiaqatigiinnut iluanaarutaassanngilaq

Nalunaarusiaq Peqqissutsimut Attaveqarnermullu Naalakkersuisoqarfimmit siunnersuisarfimmut Rambøllimut suliakkiussaavoq, inuiaqatigiinni aningaasarsiornikkut kingunerisinnasanik nalilersuinerusoq. Tassanilu kujataani angallannikkut pissutsit allanngortinneqarpata kingunerisinnaasai nalilersuiffigineqarput.

Nalunaarusiami assigiinngitsunik arfinilinnik takorluugaliorput, taakkua Qaqortumi timmisartunut mittarfiliortoqarpat Narsarsuarmilu mittarfk atorneqarnikinnerulerpat kingunerisinnaasai pineqarput.

Takorluukkat ilaat ataaseq nalunaarusiami inerniliunneqartumi iluanaarutaanerpaasussatut isiginiarneqarpoq.
Tassani Narsarsuarmi mittarfik miffissiaannangortinneqassaaq, Qaqortumilu mittarfimmik 1.119 meterisut takitigisumik mittarfiliortoqassalluni.

Taamaaliorneq missingersuusiortarnissanut aammalu atugarissaarnerup aningaasalersornissaanut naleqqunnerpaasoq nalunaarusiami nalilerneqarpoq, aammalu nunatta aningaasaateqarneranut ajutoortitsinnginerpaasussatut eqqaaneqarluni, taavalu aningaasarsiornikkut politikkimut ajoqutaannginnerusussatut eqqaaneqarluni.

Takorluugaq taanna takorluukkani arfinilinni pitsaanerpaatut nalilerneqarneranut pissutaaavoq, Narsarsuarmi mittarfimmi pigisat assigiingitsut piffissap naliliiffiusup naanerani suli naleerutivissorsimassanngimmata, tassalu suli tunineqarsinnaasussaassallutik.

Qaqortumi timmisartoqarfiliornikkut Narsarsuarmi qimatat taakkua nalingisa sinneri naatsorsuinermi ilaanngippata, takorluukkat taakkua marluk imminnut akilersinnangitsut nalunaarusiami allapput. Aamma erseqqissaapput Kujataani angallannikkut aaqqissuusseq allanngortinnginnissaa, inuiaqatigiit aningaasaqarnerannut akilersinnaanerussasoq misissukkat paasinarsitikkaat.

Aamma aningaasat kaaviiaarnerannik nalilersuinermi, Rambøllip aamma suliaani takutinneqarpoq, sanaartornermi aningaasaliissutit attartorneranni erniat ilanngunnagilluunniit ingerlatsinermi aningaasartuutitigut ukiuni 25-ni amigartoorutit 2,8 millionit koruuniussasut. Ukiut 25-it pineqartut tassapput timmisartoqarfiliornissami suliniutip tamarmiusup isigineqarfia.

Tassalu Qaqortumi mittarfik ukiumut sinneqartooruteqartarfiusarnavianngilaq.
Taamaammat aamma aningaasaliisartut namminersortut, Namminersorlutik Oqartussat qularnaveeqqusiinngippata imaluunniit aningaasanut inatsisikkut aningaasaliisoqanngippat, mittarfiup sanaartorneqarneranut aningaasaliinissaat ilimagineqanngilaq.

Aningaasanummi inatsisisikkut aningaasaliisoqaraluarpat, tamanna aningaasaleeriaatsinut allanut naleqqiullugu Mittarfeqarfiit ernianik akiliinissaat pisariaqartussaanngilaq .  
Ksianni Namminersorlutik Oqartussat qularnaveeqqusiippata taakkua aningaasaliissutinut allanut iluanaarutaasinnaasunut  atorneqarsinnaajunnaassasut, nalunaarusiami allassimavoq.

Kujataani kiffartuussinermi isumaqatigiissut allanngorlugu, ilaasunik qulimiguullit umiarsuillu atorlugit angallasisoqalerpat, tamanna qanoq kinguneqassanersoq nalunaarusiami isumaliutigineqarsimavoq.