Kinguaassiuutitigut innarlerneqarsimasut tamarmik misigisartik piffissami sivisuumi ajornartorsiutigisarpaat, inuunertillu artornarnerusutut isigisaraat imminnullu akueriuminaatsittartut SFI-p nalunaarusiamini ilaatigut allappaa.
Kinguaassiuutitigut atornerlunneqarsimasut imigassamik ikiaroornartumillu atornerluigajunnerusarput, ilinniakkaminnillu naammassinnittartut ikinnerusarlutik.
Arnani kinguaassiuutitigut innarlerneqarsimasut meeqqat atuarfiani naammassereernermik kingorna ilinniakkamik aallartitsinissaat ilimanannginnerusarpoq, meerartaajaarnissaallu ilimanarnerusarluni.
Ataasiarlutik kinguaassiuutitigut atornerlunneqarsimasut atornerlunneqaqqinnissamut navianartorsiornerusartut aamma SFI-p nalunaarusiaani ersersinniarneqarpoq.
Kommunini ataatsimiluunniit kinguaassiuutitigut innarliisoqarnissaa, kommuninut allanut naleqqiullugu malunnaatilimmik ilimanaateqarnerunngitsoq aamma inerniliussanut ilaavoq.
Inuit ilisimasarivallaanngisat kinguaassiuutitigut atornerluisartut nalinginnaaneruvoq, kisianni aamma ilaquttat qanigisarinnginnerusat, ilaquttanullu ikinngutit tassaakajupput kinguaassiuutitigut atornerluisartut.
Naalakkersuisup nalunaarusiaq atorniarpaa
Nalunaarusiarlu kinguaassiuutitigut atornerluisarneq akiorniarlugu atorneqarsinnaasoq, ilaqutariinnermut isumaginninnermullu Naalakkersuisoq Martha Lund Olsen isumaqarpoq.
- Suleriaasitta ineriartorteqqinnissaanut atorluarsinnaagipput isumaqarpunga, Martha Lund Olsen oqarpoq.
Arnani inuusuttuni affaat qaangilaarlugit angutinilu pingajorarterutit 15-inik suli ukioqalernatik atoqatigiinnermut tunngasunik misigisaqaqqaarsimasartut, nalunaarusiami aamma atuarneqarsinnaavoq.
Misissuinermi Inuusuttut 18-iniit 25-nut ukiullit akornanni 151-it peqataapput.