Nalunaarusiaq nutaaq: Aliasuttunut aaqqissuussaasumik neqeroorutit nunatsinni amigaataapput
- Aliasunneq qaangeruminaallunilu nipaarsaarussaavoq, amerlasuullu oqallisigiuminaatsippaat (aamma Kalaallit Nunaanni).
Danmarkimi Det Nationale Sorgcenterimi ilisimatuut pingasut taama oqarput. Taakku nalunaarusiaat "Sorg i Grønland - en undersøgelse af sorg og kortlægning af sorgaktører og tilbud", tassa Kalaallit Nunaanni aliasunneq – aliasunnermik misissuineq, aliasuttunik suliaqartartut neqeroorutillu, saqqummeqqammerpoq.
Nalunaarusiami aliasunneq marlunnut immikkoortinneqarpoq: Aliasunnermi qisuariaatit nalinginnaasut katsorsarneqarnissamik pisariaqartitsiviunngitsut aamma aliasunnermi qisuariaatit qaangeruminaatsut katsornarneqarnissamillu pisariaqartitsiviusut.
Nunatsinni qaangeruminaatsumik aliasunnissamut assigiinngitsunik aarlerinartoqarpoq: Imminut toquttut, nalinginnaanngitsumik toqusoqarnera, sumiginnagaaneq meeraanermilu kingusinnerusukkulluunniit annaasaqarneq ataatsimoortillugit, nalunaarusiami allassimapput.
Aliasunnermut ilisimasaqarneruneq
Nalunaarusiaq naapertorlugu aliasunnerit nalinginnaasut qaangeruminaatsullu pillugit katsorsarneqarnissamut neqeroorutit nunatsinni amigaataapput. Pingaartumik meeqqat inuusuttullu qimagaasut ukkatarineqartariaqarput.
Suliniuteqarfineqartussatut pisariaqartut ukuupput:
- Aliasuttunut katsorsaanermut tunngasumik kulturmut naleqqussarsimasumik atajuartussamillu ineriartortitsineq pilersitsinerlu, aallaqqaasiullugu aarlerinarnerusuniittunut (imminut toquttoqarneranik nalaataqarsimasunut aamma meeqqat inuusuttullu). Aallaqqaammut periarfissat teknologiilu (nittartakkatigut aliasuttunut katsorsaaneq) siammarterinissamut isumaliutigineqassapput.
- Sulianut ilisimasanik tarnikkut katsorsaanissamut neqerooruteqartarnerit akimorlugit ataqatigiissaarineq.
- Isumaginnittoqarfiit akimorlugit suliamut katsorsaanermullu tunngatillugu malittarisassanik ineriartortitsineq atulersitsinerlu.
-
Aliasuttunik sullissisunik piginnaasarneruleriartortitsinermut taakkualu ineriartornerini ikorfartuinermut ataatsimoortumik pilersaarusiorneq, najukkani sulisoqarnermik inerisaanermik sulisoqarlernermillu ukkatarinniffiusoq.
Tigusiffik: Nalunaarusiaq "Sorg i Grønland - En undersøgelse af sorg og kortlægning af sorgaktører og tilbud".
Nalunaarusiamimi aliasunnermut aliasunnermilu qisuariaatinut tunngatillugu suliatigut ilisimasaqarnerulernissaq ujartorneqarpoq, matumani aliasunnermik nalinginnaasumik qaangeruminaannerusunillu immikkoortitsinissamut ilisimasat sakkussallu ilanngullugit.
Innuttaasoqassuseq suliamillu ilisimasallit amigaataanerat eqqarsaatigalugit suliniuteqarfigineqartussat sisamat tamarmik (Paasissutissat takuuk) aliasunnermut aliasunnermiillu qisuariaatit qaangeruminaatsut iliuusissanut pioreersunut iliuusissatut pilersaarutinut suliniutinullu ilanngunneqassapput.
