Nalunaarusiaq: Naalagaaffeqatigiinnerup iluani agguataarineq ersarluttoq
Issittumi Danmarkip nunatut inissisimanera siunissami ersarluppoq, nunatta danmarkillu akornanni akisussaaffinnik agguataarineq tamakkiisumik erseqqarinngimmat. Nalunaarusiami nutaami illersornissamut ilisimatusarfimmi sorsunnissamut ilisimatuup Alexander Hviidip suliaani tamanna ersersinneqarpoq.
Isumaqatigiissut tulluutinngitsoq
Ilisimatuup Alexander Hviidip tikkuarpaa, namminersornerunissamut isumaqatigiissutip 2009-meersumi suliassaqarfiit angerlaassorneqarsinnaaneranut tunngasut nunani tamalaani maleruagassanut tulluutinngitsoq.
Illersornissamut ilisimatusarfiup nalunaarusiaani allassimavoq, Kalaallit Nunaata Danmarkillu akornanni pissaaneq ersernerluttoq, sulilu nunat tamalaat akornanni nuna ataasiusoq, tassa Danmarki.
- Kalaallit Nunaata atanermut kiffaanngissuseqarnermullu uteqattaarnerata nunatta danmarkillu akornanni namminersortuunerup agguataarneqarnera ersernerlutsilerpaa, taassumalu naalagaaffeqatigiinneq qajannarsisissinnaavaa.
Isumaqatigiissut erseqqissartariaqartoq
Taamaattumik maanna pisut eqqarsaatigalugit qalasersuarmut piginnittussaaneq imaatigut aqqutit nutaat pillugit assortuuttoqartillugu Kalaallit Nunaata Danmarkillu akornanni naleqqutinngitsumik pisoqarnissaa pilersinnaasoq, nalunaarusiortulli innersuuppaat Kalaallit Nunaata Danmarkillu imminnut attuumassuteqarnerat erseqqinnerulersinneqassasoq.
