VIDEO Nalimmassaanermut Sermersuup pilliutai amerlavallaarsorineqarput
Kommuneqarfik Sermersooq aappaagumut 45 million koruuninik amerlanerusunik pilliuteqartussanngornera erloqinartutut nalilerneqarpoq.
- Erloqinarpoq kisianni allatut ajornaqaaq amerlanerussuteqartut aalajangereeraat allanngortissinnaanngilarput, sunniisinnaanerput tamaat atoraluarparput, Peter Davidsen Siumumik Kommuneqarfik Sermersuumi kommunalbestyrelsimut ilaasortaq KNR-imut oqarpoq.
Maannalu Kommuneqarfik Sermersooq kommunini piitsuunerpaanngortoq, Inuit Ataqatigiit sinnerlugu kommunalbestyrelsimi ilaasortaq, Mille Søvndahl Pedersen, naliliivoq.
Aamma atuaruk IA Siumullu nalimmassaanermut aaqqiigallarneq isumaqatigiinngissutigaat
Kommunalbestyrelsimi illuatungiliuttut pilliutissat aamma amerlavallaarsoraat.
- Siumut gruppeminngaanniit siunnersuutiginikuuarput akileraarutini procentiata missaa, tassalu 30-35 millionit tungaanoorput taanna, tassa taanna kommunip nammassinnaassagaa isumaqarnikuuvugut, Peter Davidsen KNR-imut oqarpoq.
Nalimmassaagallarnissamut aningaasat 2015-imi pilliutigineqartussat piareersimaffiginiarlugit Kommuneqarfik Sermersuumi 2014-imi soraarsitsisoqareerpoq.
Kommunimi aqutsisut pisooqataapput
Kommuneqarfik Sermersuup aningaasameerneranut kommunimi aqutsisut aamma nammineq pisooqataasut, Siumut sinnerlugu kommunalbestyrelsimi ilaasortaq isumaqarpoq.
- Nalimmassaaneq ukioq manna assut annernarpoq, pissutigalugu ilaatigut kommuni aningaasanik aqutsinerlummat. Oqinneerarsuusimassagaluarpoq aningaasaqarneq iluamik kommunimi ingerlasimasuuppat, taava sinerissamut pilliuteqarnissarput annernannginnerusimassagaluarpoq, Peter Davidsen KNR-imut oqarpoq.
