Nalimmassaanermut isornartorsiut qinngasaarinerinnaavoq

Kommunit aningaasatigut nalimmassarneqarnerannut tunngasunik Inuit Ataqatigiit siulittaasuata, Sara Olsvigip isornartorsiutai Aningaasaqarnermut Naalakkersuisumit, Andreas Uldumimit paasiuminaatsinneqarput.
Assi © : Jonas Fievé/KNR
aggustip 28-at 2015 17:58

Andreas Uldum isumaqarpoq Inuit Ataqatigiit isornartorsiutaat qinngasaarinerinnaasut, oqarluni Inuit Ataqatigiit akisussaassusermik maanna tigusisariaqalersut siunnersuutinillu tigussaasunik siunnersuuteqartariaqalersut.

- Tassami akisussaaffimmik nammineq tigummisimagaanni nalimmassaanerlu kommuninut tunniussimagaanni oqippallaaqaaq taama uparuartuissalluni, Andreas Uldum oqarpoq.

Inuit Ataqatigiit siulittaasuata, Sara Olsvigip paragraf 37 naapertorlugu Naalakkersuisunut apeqquteqaammini ilaatigut ujartorpaa, kommunini ataasiakkaani aalisarnermit akileraarutitigut isertitat qassiunersut. Tamassumalu paasineqareernerani kommunit aningaasatigut nalimmassarneqarnerannut aalisarnermit isertitat ilanngullugit nalimmassaanermut atorneqartariaqartut.

Aamma atuaruk Kommune Kujalleq naligiissaarineq pillugu naammagittaalliutissaqarpoq

Aalisarnermilli akileraarutitigut kommunit ataasiakkaat qanoq amerlatigisunik isertitaqartarnersut paasiniassallugu imaasiallaannaq pisinnaanngitsoq, Aningaasaqarnermut Naalakkersuisoq oqarpoq.

- Soorunami tamanna pitsaanerusinnaagaluarpoq, kisianni kisitsisit datami allassimasut pigisagut naaperlugit aalajangersimavugut kommunit aningaasatigut nalimmassarneqarnerat taama isikkoqarallassasoq, ukiut pingasullu tamanna atuukkallassasoq aalajangerluat, datami allassimasartut pitsaanerulernissaata tungaanut.

Tassalu tamannarpiaq ilaatigut pillugu, Sara Olsvig Naalakkersuisunit pitsaanerusumik akissuteqarfigineqarsinnaasimanngitsoq, Andreas Uldum oqarpoq.

Aamma atuaruk Andreas Uldum: Kommuneqarfik Sermersooq kisimi sinnerlugu naalakkersuisuunngilanga

Ukiut arlallit siumut isigisumik Naalakkersusiut aaqqiissutissanik pissarsiaqarsinnaasimannginnerat, Sara Olsvip paasisinnaagaluarlugu, taanna oqarpoq, paasisinnaanagu Naalakkersuisunit siunnerfiit erseqqarluppallaarneri aamma Naalakkersuisunit suut tunaartarineqarnersut paasiuminaatsillugit.

Tamannali aamma aksissutissaqartoq, Andreas Uldum oqarpoq.

- Suliaq soorunami pimoorullugu ingerlapparput, ksianni tunngavissat pitsaanerpaat angunissaat pigaarneruvoq sukkasuumik tamassuma suliarineraniit, Andreas Uldum oqarpoq aamma erseqqissaatigalugu kommunit nalimmassarneqarnerat Inuit Ataqatigiit Naalakkersuisuugallarnerminnili allanngortissimasinnaagaluaraat.

Aamma atuaruk Kommunit nalimmarsarneqarnerat ersernerluttumik tunngaveqarpoq

Taama oqareerluni Aningaasaqarnermut Naalakkersuisoq, Andreas Uldum ima aamma oqarpoq:

- Suleqatigiinnissamut ammavugut, qanorlu pitsaanerusunik angusaqarnissarput pillugu siunnersuuteqarsinnaapput. Taamaammat Inuit Ataqatigiit pitsaasunik isumassarsiaqarpata suleqatigikutsoorsinnaavagut.

Naalakkersuisut Inuit Ataqatigiinnit isornartorsiorneqareersullu, Aningaasaqanermut Nalakkersuisoq, Andreas Uldum taama oqarpoq.