2017-imut aningaasanut inatsit Naalakkersuisooqatigiit nutaat ima akeqarput
2017-imut aningaasanut inatsit isumaqatigiissutigineqartoq aningaasaqarnermut naalakkersuisup Aqqaluaq B. Egedep tusagassiuutinut nalunaarummi arfininngormat unnukkut nalunaarutigaa.
Naalakkersuisut nutaat allannguutissatut 175-inik siunnersuuteqarput. Siunnersuutillu aningaasaqarnermut ukiuni sisamani tullerni 144 millionit koruuninik ajorseriartitsissapput.
Partiit Siumut, Inuit Ataqatigiit, Partii Naleraq Atassullu Naalakkersuisunut isumaqatigiissuteqartuupput.
Ineriartorneq ernumanartoqartinneqartoq
Inatsisartulli aningaasaqarnermut akileraartarnermullu ataatsimiititaliaata aningaasaqarnerup ajorseriarnernera ernumassutigaa, aningaasanullu inatsisissatut siunnersuutip pingajussaaneerneqarnissaanut isumaliutissiissummi ima allalluni.
- Annertuumik amigartooruteqarneq qinigaaffimmi matumani taamaallaat pinnani aammali qinigaaffimmi
tullermi aggersumi aningaasaqarnikkut siunissami anguniakkanut annertuumik unammillerfiusussaassasoq ataatsimiititaliaq isumaqarpoq, ataatsimiititaliaq allappoq, nangillunilu.
- Tassunga atatillugu ataatsimoortumik pingaarnersiuilluni tulleriiaarisarnermik tunngaveqarnerup inuiaqatigiit aningaasaqarneranni nammanneqarsinnaasumik aningaasartuutinik aqutsisoqarnissaanik
qulakkeerinnittussap qimanneqarneratigut aarleqqutigineqarsinnaasut sakkortuumik isumaliutigeqqullugit Naalakkersuisut ataatsimiititaliamit kaammattorneqassapput.
Amerlanerussuteqartunit taperserneqartoq
Taamaattoq allannguutissatut siunnersuutit akuerineqarnissaat Siumup Inuit Ataqatigiillu ataatsimiititaliami ilaasortaatitaasa amerlanerussuteqarlutik inassutigaat, Demokraatit ilaasortaatitaat itigartitsinissamik inassuteqartoq.
Siumup, Inuit Ataqatigiit Partii Naleqqallu suliniutiginiagaata qanoq aningaasaliiffigitigineqarnissaannut missingersuisoqarnersoq siunnersuutip pingajussaarneqarnissaanut allannguutissatut siunnersuutini takuneqarsinnaavoq.
Suliniutit katillugit 158 millionit koruuninik aningaasaliiffigisassatut missingersorneqarput. Siunnersuutillu amerlanerit qanoq aningaasaliiffigineqassanersut Naalakkersuisut tikkuussisinnaasimanngillat.
