Nakuuserneq Nuummi iliuuseqarfigineqassaaq

Inuusuttut innuttaasullu, nakuuserneq aserorterinerlu pillugit oqallitsinneqarnerisa kingunerissavaat, isummersuutit naqitanngortinnissaat. Taamaalilluni oqariartuutit assigiit amerlasuunit piumasarineqartut, kommunalbestyrelsemit isummerfigalugit  ingerlateqinneqassallutik. Taama Nuummi borgmesteri, Agnethe Davidsen oqarpoq.

- Isummersuutit tunniunneqartut naqitanngoriarlugit misissuataassavagut, oqariartuutillu assigiaat aallaavigalugit ingerlariaqqissaagut.

- Oqallittut ataatsimoorusunneq piumavaat, tassalu annersaasarneq akuerineqarsinnaangitsoq.

Unnuarissat aallarteqqinneqarnissaat amerlasuut kissaatigimmassuk aallarteqqinneqarnissaannut qanoq ilillutik qulakkeerinninnissartik ujartuiffigissallugu borgmester, Agnethe Davidsenip aamma oqaatigaa.

Nuummi politiit isumaqatigineqarsimapput, imerniartarfiutillit unioqqutitsigaangata, kommunemut ilisimatitsissutigineqartassasoq, kommunalbestyrelse tassaammat imigassamik tuniniaasinnaanermik akuersisartoq, taamaalillunilu qanoq ilioqqinnissaminut aalajangiisussaq. Borgmester Agnethe Davidsen oqarpoq.