Nakorsassaaleqineq ernumassutigineqartoq
Ukioq 2035-imi danskit nakorsiarnissaannut nakorsanik 5.500-nik amigaateqassapput. Danmarkimi nakorsat kattuffiata Yngre Læger-p misissuisimanerisa tamanna takutippaa.
Tamannalu Kalaallit Nunaannut malunnaateqassaaq.
Danmarkimimi nakorsanik amigaateqartoqarpat, nunatsinni malunniutissammat, nunatsinnimi nakorsat amerlanerit Danmarkimit atorfinitsinneqartarmata.
Ole Lindip, Kalaallit Nunaanni Nakorsat kattuffianni siulittaasup misissuinermi inernerit takusimavai ernumavorlu. Siunissami nakorsat amerlassusissai kisiisa pinagit maannali nakorsaqarniarneq eqqarsaatigalugu aamma.
Tamannami Ole Lind naapertorlugu isumakulunnartoqarmat.
- Siunissami qaninnermi pisussanut ernumanartoqareerpoq. Ukiorpassuarni nakorsanik sinerissami sivisuumik atorfeqartussanik atorfinitsitsiniarnerput ajornakusooreerpoq, maannalu nakorsat immikkut ilinniagallit Dronning Ingridip Napparsimavissuani kinguaariit nikinnissaat tullinnguuppoq, assullu ernummassutigaara qanoq pisoqarumaarnissaa, nakorsat taarserneqarsinnaassanersut, ukiorpassuarnimi nakorsarisimasagut Kalaallit Nunaannik nalunngisaqarluarmata, Kalaallit Nunaanni Nakorsat kattuffianni siulittaasoq KNR-imut oqarpoq.
Taanna isumaqarpoq, nakorsanik nunatsinnut kajumilersitsiniarnermi pingaarnerpaat ilagigaat akissassiagitsitsinerusinnaanerput.
Peqqissutsimut Pitsaaliuinermullu Aqutsisoqarfimmi nakorsaaneq Anne-Marie Ulrik misissuinermit inernerit suli takusimanngilai, siunissamulli ilimagisat radioaviisimit tusarlugit.
Tassunga erseqqissaassutigaa, sivitsortumik ernumassutissaqarneq malugereersimallugu, peqqinnissaqarfiulli ukiorpassuarni nunatsinni napparsimaveqarfinni nakorsassarsiorneq sulissutigisimagaat.
- Misissuinerup taassuma inerneri annermik ernumalersitsinngillat maannami pissutsit pioreersut ernumanareermata, ukiorpassuarnimi nakorsanik atorfinitsitsiniarneq ajornartorsiutigereerparput. Soorunami nunarsuarmi allani nakorsassaaleqisoqalerpat, taava avinngarusimasuniittut soorlu Kalaallit Nunaat eqqugaassapput.
- Taamaattumillu siunissaq eqqarsaatigalugu iliuuserisinnaasatuarput tassaavoq kalaallinik nakorsatut ilinniartoqarnissarput. Siunissaq eqqarsaatigalugu tamanna anguniarparput, Nakorsaaneq Anne-Marie Ulrik KNR-imut oqarpoq.
