Nakkutilliisoqatigiit: Qaasuitsup Kommuniani assigiinngitsupilussuarmik ingerlatsisoqarpoq
Meeqqat inuusuttullu pillugit suliat Qaasuitsup Kommuniani qanoq suliarineqartarnerat assigiinngissuteqartupilussuuvoq.
Namminersorlutik Oqartussat illoqarfinni Ilulissani, Qasigiannguani, Qeqertarsuarmi Aasiannilu isumaginninnikkut sullissinermik nakkutilliineranni tamanna paasinarsivoq.
Qeqertarsuarmilu sullissineq ajornerpaavoq.
Nakkutiliisoqatigiit siorna juunip qaammataani nakkutilliinerminnik nalunaarusiaanni Qeqertarsuarmi sulianik ingerlatsineq "naammaginanngilluinnartutut" oqaatigineqarpoq.
Nalunaarusiami aamma atuarneqarsinnaavoq Qeqertarsuarmi meeqqat inuusuttullu pillugit sulianut tamakkiisumik takussutissartaqanngitsoq. Tigoriaannanngorlugit ataatsimoortillugillu katersorneqarsimanngillat imaaliallaannarluni pissarsiarineqarsinnaanatik.
Qeqertarsuarmullu tunngatillugu meeqqanik inuusuttunillu sullissinermik suliassaq ataatsimut isigalugu inunnik isumaginnittoqarfimmit naammassineqarsinnaanngitsoq nakkutilliisoqatigiit inerniliipput.
Aamma Aasianni sulianut tunngatillugu tamakkiisumik takussutissaqarnissaq ajornartorsiutaavoq sulianilu allagaatinik amigaateqartoqarluni. Taamaammat illoqarfimmi meeqqat pillugit suliat ammasut tamaasa misissorneqarnissaat nakkutilliisoqatigiit kaammattuutigaat.
Ilulissani Qasigiannguanilu sulianut tunngatillugu ingerlalluartoqartoq Nakkutilliisoqatigiinnit paasineqarpoq, isumaginninnikkut sullissinermi malittarisassat sulisunit paasilluarneqarsimallutik.
Namminersorlutik Oqartussat immikkoortortanik nakkutilliinerisa siunertaraa isumaginnermut inatsisiliornerup iluani malittarisassanik kommunit malinninnersut nakkutigissallugu.
