Najortip meeqqat pisariaqartitsisut tapersersussagai
Tassalumi ataatsimiinnermi Najortit oqaluuserineqarput.
Isumaginninnermi suliaqartoqartillugu meeraq kisiat pillugu Najortimik peqataasoqaraangat meeqqap qanoq pisoqalerneranik paasinninnissaa oqaloqataanissaalu qulakkeerneqartartoq, isumaginninnermut siunnersorti, Grethe Siegstad isumaqarpoq.
- Meeraq pisinnaatitaaffeqarpoq aamma nipini, takuneqarnissani, isummani aamma peqataatinneqarnissaa. Tassunnga tunngassuteqartut sunniuteqartussaammata. Meeqqap nipaa nipilersoqataanissaa pingaartipparput, taamaattumik meeraq qitiutillugu isumaa, inuttaa ataqqillugu nalilerujuuvoq meeqqamut naleqartutut misiginissaa, Nuummi qimarnguimmi isumaginninnermi siunnersorti, Grethe Siegstad KNR-imut oqarpoq.
Aamma atuaruk Meeqqat inuusuttullu inuuniarnermikkut ajornartorsiortut illersuisoqalissapput
Suliamut tunngasunik oqaatsit paasiuminaassinnaasut atorneqaraangata, meeqqap paasinninnissaa najortip suliassaasa ilagaat. Aammali soorlu meeraq ulloq unnuarlu paaqqinnittarfimmut inissinneqassappat oqaasertaliinissamik ikiuisussaallutik.
- Pisoqalernerani meeqqamut aamma nassuiaateqarnissaq, isumaata tusarniaaviginissaa susoqalernersoq: sumunngalersugununa? Sooruna taamaattoqalersoq? Illit qanoq isumaqarpit? Qanorlu aamma uagut ikiuussinnaavugut?, Grethe Siegstad aperaaq.
Taanna naapertorlugu meeqqap tusarnaarneqarnissaa meeqqap inuttut ineriartornissaanut pingaaruteqarluinnarpoq.
- Meeqamut naleqartorujussuupput. Meeqqap takuneqarnini, naleqarnini, peqataatinneqarnini, illersorneqarnini, aqqutissiuisoqarnini, isumaata nipilersoqaanera aamma taassuma iluaniikkami pingaaruteqartorujussuuvoq, Grethe Siegstad oqarpoq.
Meeqqat inuttut allatulli soorunami misigissuseqarput, isumaginninnikkullu oqartussanit aalajangiiffigineqarnermi, nalornineq ilaasinnaavoq.
- Imatut aamma saatsissinnaavarput: inersimasoq suliffiup iluani allannguuteqassappat, illit peqataatinneqanngikkuit, qulaaniit pisoqalernerani peqataatinneqanngikkuit, qanoq issavit? Tupassaatit. Nalornilissaatit, taamaattumik taanna peqataatitsinissaq, inersimasuuguit, meeraaguilluunniit naligiimmik taakku nipilersoqataanissaat pingaarpoq, Grethe Siegstad oqarpoq.