Naja Abelsen saqqummersitsilersoq
Eqqumiitsuliortup suliamini oqaluttuatoqaatitsinnik tunngaveqarnerusarput.
Saqqummersitsinermilu matumani sammisat arfiniliupput, Naja Abelsen taama oqaluttuarpoq.
Ilaatigut oqaluttuatoqqat tunngavigalugit digitalimik suliat, inuit ullorissanik isiginnittaasiannut, silaannarsuarmi iluserititaannut qilaallu tappavanersuaq ulamernerani isigisaat titartarlugit takusassiarissavai.
Suliat nammineq assilisanit titartakkanillu photoshop atorlugu katitigaapput.
Sammisaq alla tassaavoq inuit nunarsuup pissarititaanik atuinerat atornerluinerallu.
Eqqumiitsuliortoq alla, Bolatta Silis-Høegh, assigalugu Naja Abelsenip Narsami saffiugassanik qaqutigoortunik piiaanissamik, taamatullu aamma uranimik piiaanissamik pilersaarutit ernumanartoqartippai.
- Eqqarsaatigalugu artorpara! Nunarput allat nunarsuatsinnik tamarmiusumik sequtserineranni peqataasariaqanngilaq! Katuami saqqummersitsinissap allaaserineqarnerani Naja Abelsen taama oqarpoq.
Saqqummersitsineq Katuami ullumi sisamanngornermi nalunaaqutaq 16 ammarneqassaaq eqqumiitsuliortullu suliai decembarip 17-iata tungaanut takuneqarsinnaapput.
