Naggueqatitta eqqumiitsuliortup toqunera Canadami aviisit saqqaanni sammineqartoq
Pootoogook Canadami naggueqatigiit inuit akornanni eqqumiitsuliortuni tusaamaneqarnerit ilagaat.
Taassuma toqunera aviisini pingaarnerit ilaattut allaaserineqarpoq, toqunera pasinapiluttoqarnerarlugu, maannalu politiit misissuipput, toquneranut peqquserluttuliortoqarsimanersoq misissuiffigineqalermat.
Politeeq Annie Pootooguup toquneranut atatillugu misissuisoq oqarsimavoq, Annie Pootoogook putumasimasinnaasoq kuummullu nakkarluni. Politiip oqarnera imatut paasillugu naggueqatigiit inuit amerlasuut imigassamik aalakoornartumik atuisarmata imaasinnaasoq aalakoorluni kuummut nakkarsimasoq.
Politiip taama oqaaseqarsimanera mamianartuliatut isigineqarpoq ammillu qalipaataanik assigiinngisitsinertut isigineqarluni.
Natan Obed Inuit Taperiit Kanatami præsidenti aviisimi Globe and Mailimi apersorneqarluni oqarpoq, politeeq Canadami innuttaasut paarineqarnissaannik isumagineqarnissaannillu suliaqartoq taama nikassaarpalutsigisumik oqarsinnaammat kanngunartuliaasoq.