Nunanit allanit

Naggueqatitta eqqumiitsuliaat Canadami eqqumiitsulianik katersugaasivimmiitinneqalersut

Nunavummiut eqqumiitsuliaat 7.000-it Nunavummi naalakkersuisunit pigineqartut annaanniarlugit Canadami illloqarfimmi Winnipegimi eqqumiitsulianik katersugaasivimmut nuunneqalerput.
Assi © : AJ Batac/Flickr Creative Commons
Allattoq Marianne Stenbæk, Montreal, Canada
novembarip 24-at 2015 09:47
Nutserisoq Jaaku Lyberth

Nunavummi naalakkersuisut eqqumiitsulianik katersugaasivimmik sanassagaluarpata tamanna ukiut tallimat missaannik sivisussuseqartussaammat, naalakkersuisut  Winnepegimi eqqumiitsulianik katersugaasivimmik isumaqatigiissuteqarput, eqqumiitsuliat katersarineqartut ukiuni tallimani paarineqarnissaannik.

Winnipegimi eqqumiitsulianik katersugaavik, Canadami naalagaaffimmi Manitobamiittoq, naggueqatigiit inuit nutaalliaanerusunik eqqumitsuliaannik amerlanerpaanik katersugaateqarpoq, taakkua 14.000-it missaannik amerlassuseqaramik.

Katersarineqartut tassaapput qalipakkat, ujaqqanik kigartukkat, saaanernik qiperukkat, atisat piniutillu.

Nunavummi aamma Manitobami naalakkersuisut tamarmik immikkut eqqumiitsuliat nuunneqarnissaannut 2,5 millionit koruuninik tapiissuteqarput.  

Naggueqatigiit inuit eqqumiitsuliaat taakkua Canadami sumiiffinni assigiinngitsuni inissinneqarsimasut, tamarmik Winnipegimi eqqumiitsulianik katersugaasivimmut nassiunneqassapput.

Tassani aalajangersimasunut immikkoortiterneqassapput, kingornalu Winnipegimi nunanilu allani immikkut ittumik saqqummersinneqassallutik.

Nunavummi eqqumiitsulianut katersugaasivimmik sanasoqareeriarpat, eqqumiitsuliat katersorneqarsimasut, Nunavummut utertinneqarnissaat naatsorsuutigineqarpoq.

Aamma atuaruk